У ноч з 3 на 4 сакавіка ў капліцы Хрысціянскага сацыяльнага цэнтра ў Мінску адбылося начное малітоўнае чуванне ў інтэнцыі як найхутчэйшага аднаўлення набажэнстваў і парафіяльнага жыцця ў касцёле святога Сымона і святой Алены ў Мінску.
Пасля таго, як напрыканцы верасня мінулага года ў Чырвоным касцёле здарыўся пажар, прычыны якога да гэтага часу не названыя, вернікі і духавенства не маюць магчымасці маліцца ў сваёй святыні, уласнікам якой з’яўляецца дзяржаўная ўстанова.
Як паведамляецца на сайце дабрачыннай Місіі Добрага Самараніна Samaranin.by, цэлебрацыю святой Імшы падчас чування ўзначаліў пробашч парафіі святога Сымона і святой Алены ксёндз канонік Уладзіслаў Завальнюк.
Прысутныя асаблівым чынам маліліся аб Божай ласцы хутчэйшага вяртання ў святыню, каб дзверы Чырвонага касцёла былі шырока адчынены для вернікаў і ўсіх, хто шчырым сэрцам шукае Бога.
