У студзені ў Міждыяцэзіяльнай вышэйшай духоўнай семінарыі ў Гродне падчас экзаменацыйнай сесіі адбылася традыцыйная «каляда».
Вяруўшыся ў Alma mater пасля калядных канікулаў, семінарысты здаюць экзамены, якія з’яўляюцца падсумаваннем першага семестра вучобы.
Аднак фармацыя ў семінарыі — гэта не толькі вучоба, але і выхаванне ў каталіцкіх традыцыях, неабходнае для будучых святароў.
Таму, як адзначае Прэс-служба Гродзенскай дыяцэзіі, нягледзячы на атмасферу засяроджанасці, якая падчас сесіі пануе ў сценах семінарыі, там адбылася традыцыыйная «каляда». Падчас абраду духоўны айцец семінарыстаў ксёндз Ян Сарэла благаславіў пакоі студэнтаў і іншыя памяшканні семінарыі.
Напачатку ў капліцы духоўнай навучальнай установы семінарыйная супольнасць сабралася на малітве, даручыўшы Богу новы год і просячы Яго шчодрых ласкаў на гэты час.
Таксама прысутныя разам памаліліся ў інтэнцыі семінарыі і ўсіх тых, хто ўтварае яе супольнасць.
Пасля духоўны айцец благаславіў і акрапіў асвячонай вадой капліцу, пакоі выхаваўцаў і студэнтаў, кухню і сталовую, месцы вучобы.
