17 снежня ў архікатэдральным касцёле Найсвяцейшага Імя Марыі адбылася святая Імша і аплаткавая сустрэча выпускнікоў, навучэнцаў і выкладчыкаў Мінскага тэалагічнага каледжа імя святога Яна Хрысціцеля.
Цэлебрацыю ўрачыстай святой Імшы з гэтай нагоды ўзначаліў Мітрапаліт Мінска-Магілёўскі арцыбіскуп Юзаф Станеўскі. На пачатку Эўхарыстыі дырэктар навучальнай установы ксёндз канонік доктар Ян Крэміс прывітаў усіх прысутных і выказаў словы падзякі арцыбіскупу за запрашэнне на святую Імшу у галоўную святыні архідыяцэзіі.
Іерарх, са свайго боку, таксама прывітаў прысутных у архікатэдральным касцёле дырэктара, выкладчыкаў, навучэнцаў і выпускнікоў Мінскага тэалагічнага каледжа.
«Сення важная падзея: збіраемся, каб дзяліцца сваім досведам, думкамі, выконваючы заклік Хрыста „Ідзі за Мною“», — сказаў арцыпастыр.
У гаміліі іерарх звярнуў увагу на сустрэчу з Хрыстом.
«Мы ідзем насустрач шчасцю, таму ідзем у горад Бэтлеем, дзе нарадзіўся наш Збаўца Езус Хрыстус. Кожны з нас вандруе верай, думкамі менавіта туды, дзе Бог уваходзіць у гісторыю чалавечага збаўлення з Паннай Марыяй: аб гэтым сведчаць пастушкі, мудрацы. Мудрацам паказалася зорка, але там яны ўбачылі, што Таго, хто трымае ўвесь сусвет, трэба трымаць на руках; Той, хто стварыў сонца, павінен быць сагрэты», — адзначыў іерарх. —
Бог прыходзіць, каб дакрануцца да дробязяў нашага жыцця. У нашым звычайным жыцці Бог робіць незвычайныя рэчы, — дадаў арцыбіскуп Станеўскі.
На заканчэнні святой Імшы ксёндз дырэктар прадставіў выкладчыка па спецыяльнасці «касцёльны сурдаперакладчык» ксяндза магістра Яна Кузюка.
Арцібіскуп Станеўскі падзякаваў святару за згоду заняцца выкладчыцкай дзейнасцю, а таксама тым, хто пажадаў навучацца па спецыяльнасці «касцёльны сурдаперакладчык».
«Евангелізацыя павінна дайсці да ўсіх, нават да тых, хто не можа чуць, але слухае сэрцам», — заўважыў арцыпастыр.
Пасля Імшы навучэнцы першага курса каледжа прадставілі міні-спектакль, суправадзіўшы свой выступ спевам.
Арцыбіскуп Юзаф Станеўскі благаславіў аплаткі, а навучэнцы павіншавалі сваіх выкладчыкаў з надыходзячым святам, пасля чаго ўдзельнікі сустрэчы дзяліліся аплаткамі і абменьваліся святочнымі пажаданнямі.
Сустрэча завяршылася супольным пачастункам.
