10 верасня ў Нацыянальным санктуарыі Маці Божай Будслаўскай, галоўнай Апякункі Мінска-Магілёўскай архідыяцэзіі, адбылася сустрэча выпускнікоў, навучэнцаў і выкладчыкаў Мінскага тэалагічнага каледжа імя святога Яна Хрысціцеля, спалучаная з цырымоніяй інаўгурацыі 13-а навучальнага года ў гэтай касцёльнай установе.
Сустрэча распачалася супольнай малітвай адарацыі перад выстаўленым Найсвяцейшым Сакрамэнтам. З глыбокай верай у прысутнасць Езуса Хрыста ў Эўхарыстыі ўдзельнікі сустрэчы аддавалі Яму пашану, праслаўлялі, выказвалі словы падзякі, перапрашення, просьбы. Малітва суправаджалася спевам каталіцкага гурта праслаўлення Verbum Dei.
Цэлебрацыю ўрачыстай святой Імшы ўзначаліў Мітрапаліт Мінска-Магілёўскі арцыбіскуп Юзаф Станеўскі.
На пачатку Эўхарыстыі пробашч будслаўскай парафіі ксёндз Дзмітрый Дубовік асаблівым чынам прывітаў арцыпастыра, а таксама навучэнцаў, выпускнікоў і выкладчыкаў каледжа. Словы падзякі арцыбіскупу за ініцыятыву гэтай сустрэчы выказаў дырэктар кнавучальнай установы ксёндз канонік Ян Крэміс.
Арцыбіскуп Станеўскі асаблівым чынам падзякаваў пробашчу і парафіянам за малітву, якую яны перад цудадзейным абразом штодзённа ўзносяць не толькі за сябе, але і за ўсю нашу Бацькаўшчыну. Іерарх таксама прывітаў прысутных у будслаўскай святыні дырэктара, выкладчыкаў, навучэнцаў і выпускнікоў Мінскага тэалагічнага каледжа.
«Дзе ж яшчэ мы можам сустрэцца, як не ў нашай Матулі, не ў Яе доме?.. Нядаўна наша Бацькаўшчына перажывала Год малой радзімы. Тады мы ўсе вярталіся пад страху нашай хаты, да роднай матулі.
Можна сказаць, што мы прыбылі да дому нашай Матулі, Каралевы Беларусі. Прыйшлі ў школу Марыі, каб разам з Ёй распачаць новы навучальны год», — падкрэсліў арцыбіскуп.
У прамоўленай гаміліі іерарх адзначыў, што гэта асаблівы дзень для каледжа, калі ўся яго супольнасць як браты і сёстры разам сабралася на малітве з Марыяй.
«Калі знаходзішся у гэтай святыні, сэрца радуецца, і таму мы просім Езуса Хрыста зрабіць нашыя сэрцы падобным да Яго Найсвяцейшага Сэрца. Езус Хрыстус прыносіць супакой у сэрцы», — дадаў арцыпастыр.
Звяртаючыся да выпускнікоў і студэнтаў, ён разважаў над словамі Евангелля паводле святога Яна: «Не вы Мяне выбралі, але Я выбраў вас і прызначыў, каб вы ішлі і прыносілі плен» (Ян 15, 16).
«Мы павінны быць ўдзячныя Богу за тое, што Ён выбраў нас і паклікаў; павінны быць адважнымі. Нашае жыццё — гэта пакліканне, і праз вас свет даведаецца пра Езуса Хрыста, які з намі і цяпер, і пра гэта вы павінны сведчыць.
Не вы выбралі Езуса Хрыста, а Ён вас выбраў, бо знайшоў у вас моц, сілу, каб былі Яго вучнямі», — заўважыў арцыбіскуп Станеўскі.
У малітве вернікаў удзельнікі сустрэчы ў Будславе асаблівам чынам маліліся за ўсе навучальныя ўстановы Беларусі, за выкладчыкаў, студэнтаў, навучэнцаў і школьнікаў.
Пасля святой Імшы адбылася інаўгурацыя 13-а навучальнага года Мінскага тэалагічнага каледжа. У яе межах удзельнікі выслухалі даклад на тэму «Марыйны культ у Буларусі», які прамовіў ксёндз канонік Уладзімір Гуляй, доктар тэалогіі з Ліды.
Дырэктар каледжа ксёндз канонік Ян Крэміс зрабіў справаздачу за мінулы навучальны год, а таксама паведаміў, што на першы курс сёлета залічаны 16 чалавек.
Святар дадаў, што па ініцыятыве арцыбіскупа Юзафа Станеўскага ў Мінскім тэалагічным каледжы адкрываецца новая кваліфікацыя: «касцёльны сурдаперакладчык», а таксама з’яўляецца курс павышення кваліфікацыі для тых, хто ўжо скончыў каледж.
Арцыбіскуп Юзаф Станеўскі ўручыў першакурснікам заліковыя кніжкі.
Навучэнцы падзякавалі арцыпастыру за прысутнасць і выказалі пажадані, а таксама павіншавалі выкладчыкаў і першакурснікаў.
Неафіцыйная частка праграмы працягнулася абедам і інтэрактыўным адпачынкам у доме пілігрыма, дзе ўсіх удзельнікаў сустрэчы шчыра прывітаў ксёндз канонік Уладзіслаў Завальнюк з Мінска. Імпрэза суправаджалася спевамі ў выкананні гурта Verbum Dei, а таксама танцамі, у якіх удзельнічалі ўсе ахвотныя.
Прыгожым падарункам ад арцыбіскупа стала ўжо славутая песня пра ручнікі ў яго ўласным выкананні, а ад душпастыра беларускіх пчаляроў ксяндза Уладзіслава Завальнюка ўсе атрымалі ў падарунак вядзерца мёду.
Заканчэнне сустрэчы адбылося у базыліцы, дзе ксёндз Дзмітрый Дубовік пазнаёміў прысутных з гісторыяй святыні. Перад цудадзейным абразом Маці Божай Будслаўскай удзельнікі праспявалі літанію да Найсвяцейшай Панны Марыі і атрымалі благаслаўленне.
