3 ліпеня арцыбіскуп эмэрыт Тадэвуш Кандрусевіч узначаліў цэлебрацыю святой Імшы ў парафіі Божага Цела ў Мінску з нагоды 10-й гадавіны пасвячэння капліцы Маці Божай Шкаплернай.
У маладой парафіяльнай супольнасці, размешчанай у беларускай сталіцы ў раёне вуліцы Ангарская, нясуць служэнне айцы кармэліты босыя. Напачатку тут была ўзведзена і пасвячана капліца Маці Божай Шкаплернай, каб вернікі мелі, дзе маліцца, пакуль вядзецца будаўніцтва парафіяльнага касцёла.
Пасвячэнне капліцы здзейсніў дзесяць гадоў таму тагачасны Мітрапаліт Мінска-Магілёўскі арцыбіскуп Тадэвуш Кандрусевіч.
У гаміліі, прамоўленай ім на Імшы падзякі з нагоды дзесяцігоддзя пасвячэння капліцы, заслужаны іерарх узгадаў, якая радасць панавала сярод вернікаў парафіі, калі яны, нарэшце, змаглі маліцца ва ўласнай невялічкай святыні.
«Капліца і касцёл —гэта месца сустрэчы чалавека з Богам. Яно адбываецца ў Божым слове, сакрамэнтах, дабрачыннай і іншай дзейнасці Касцёла.
Хто можа сказаць, колькі ласкаў атрымалі людзі за мінулае дзесяцігоддзе ў гэтай маленькай каплічцы! Колькі людзей знайшло абарону ад зла дзякуючы заступніцтву Божай Маць Шкаплернай! Гэта ведае толькі Бог і кожны, хто сустрэў Яго тут. Няхай Богу будзе падзяка за гэты дар!» — сказаў арцыбіскуп Кандрусевіч.
Ён дадаў, што ўвесь гэты час у маладой сталічнай парафіі айцамі кармэлітамі вядзецца не толькі актыўная душпастырская дзейнасцю, але таксама будаўніцтва новага касцёла. Выказаўшы ўдзячнасць душпастырам і вернікам, іерарх пажадаў ім як мага хутчэй сабрацца разам на малітву ў сваім парафіяльным касцёле.
Пасля Імшы арцыбіскуп Тадэвуш Кандрусевіч благаславіў фігуру Маці Божай Каралевы супакою.
