Пошук

28.06.2022 15:41   Аліна Пяценка / Catholic.by

У панядзелак 27 чэрвеня распачалася 12-я Парафіяда дзяцей і моладзі Гродзенскай дыяцэзіі, якая сёлета праходзіць пад дэвізам «Супакой і Дабро».

У мерапрыемстве бяруць удзел прадстаўнікі 25-і парафій. Акрамя Гродзенскай дыяцэзіі, на парафіяду ў Гродна прыбыла таксама каманда з парафіі Найсвяцейшай Тройцы з Глыбокага (Віцебская дыяцэзія).

Усяго 217 хлопцаў і дзяўчат сабраліся ў горадзе над Нёманам са сваімі апекунамі, каб удзельнічаць у спаборніцтвах, якія праходзяць у трох намінацыях: «святыня – тэатр – стадыён».

Парафіяда распачалася святой Імшой у гродзенскім касцёле Найсвяцейшага Адкупіцеля. Цэлебрацыю ўзначаліў біскуп Гродзенскі Аляксандр Кашкевіч. Напачатку іерарх сардэчна прывітаў арганізатараў і ўдзельнікаў парафіяды, пажадаўшы ім з карысцю для душы і цела правесці гэты час.

Гамілію прамовіу ксёндз Андрэй Ядкоўскі CSsR, які нагадаў сабраным, што Марыя з’яуляецца найлепшым прыкладам таго, як трэба разумець і адказваць на Божую ласку. Напрыканцы святой Імшы у святыню быў унесены сцяг Парафіяды, і такім чынам яна афіцыйна распачалася.

Пасля супольнай малітвы хлопцы і дзяўчаты сустрэліся на спартыўных спаборніцтвах па валейболе і шашках, паказалі свае таленты ў музычных конкурсах і конкурсе малюнкаў, а таксама прадэманстравалі веданне Бібіі і гісторыі Касцела.

Дух спаборніцтва натхняў удзельнікаў на тое, каб найлепш паказаць свае здольнасці, але пры гэтым удзельнікі ўсведамляюць, што час Парафіяды з’яўляецца перадусім часам сустрэчы з Богам і з іншым чалавекам.

Першы дзень Парафіяды завяршыўся супольнай малітвай.

 

 

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.