12 чэрвеня ў санктуарыі Гродзенскай дыяцэзіі Марыі Божай Каралевы нашых сем’яў у Тракелях сабраліся прадстаўнікі Францішканскага ордэна свецкіх з усёй Беларусі на супольную малітву разам з арцыбіскупам эмэрытам Тадэвушам Кандрусевічам.
Заслужаны іерарх узначаліў для сабраных удзельнікаў Трэцяга ордэна святога Францішка цэлебрацыю святой Імшы ва ўрачыстасць Найсвяцейшай Тройцы.
Вітаючы прысутных, арцыпастыр адзначыў, што святы Францішак Асізскі з’яўляецца заснавальнікам свецкіх супольнасцяў вернікаў, якія па-за мурамі кляштараў жывуць харызмай гэтага ордэна.
«Адсутнасць бачных знакаў прыналежнасці да манаскай супольнасці з’яўляецца выклікам практыкаваць францішканскую духоўнасць у свецкім жыцці і шансам ісці туды, куды не заўсёды можа трапіць святар або манах. Гэта вельмі важна ў наш час, калі многія жывуць так, як быццам Бог не існуе.
У гэтым сэнсе інстытут тэрцыярыяў пакліканы адыграць сваю незаменную ролю ў распачатым Святым Айцом Францішкам сінадальным працэсе, які цяпер адбываецца ў Касцёле», — падкрэсліў арцыбіскуп Кандрусевіч.
Ён дадаў, што беларускія тэрцыярыі прыйшлі да Божай Маці Тракельскай, каб дзякаваць Богу за пакліканне, аднавіць і паглыбіць такое патрэбнае ў Касцёле служэнне свецкіх вернікаў у духу харызмы святога Францішка, набрацца новага духа і энергіі ў служэнню Касцёлу.
«Па Божым Провідзе свята беларускіх францішканскіх тэрцыярыяў сёлета супадае з урачыстасцю Найсвяцейшай Тройцы. Гэта аб’яўленая нам таямніца веры, што Бог адзін у трох асобах: Бог Айцец, Сын і Дух Святы. Яна нагадвае аб еднасці і непадзельнасці адзінага ў трох асобах Бога.
Менавіта такога адзінства і ўзаемнай любові так не хапае сучаснаму свету.
Колькі падзелаў у сем’ях, у грамадствах! Колькі нянавісці, гвалту і ваенных дзеянняў! Колькі зла! А ўсё таму, што паміж людзьмі няма адзінства. Мы не ўмеем бачыць у іншым чалавеку свайго брата і сястру, таму застаемся ў жыццёвай цемры.
Дасягненне адзінства ў такім падзеленым свеце з’яўляецца нялёгкай справай. Яно патрабуе ўзаемнага прабачэння і будавання еднасці ў разнастайнасці. Недахоп еднасці, якая грунтуецца на любові, перашкаджае ў будаванні справядлівага свету», — канстатаваў іерарх, звярнуўшы ўвагу на актуальнасць у сувязі з гэтым дэвізу служэння святога Францішка і яго духоўных паслядоўнікаў: «Супакой і дабро».
«Не будзе міру і справядлівасці без даверу Богу, без жыцця ў праўдзе і любові», — сцвердзіў арцыпастыр.
«Ля падножжа Божай Маці Тракельскай ўзгадаем словы Марыі ў Кане Галілейскай: „Зрабіце ўсё, што вам скажа Сын“. Гэта духоўны запавет Марыі.
Як тады стаўся цуд перамянення вады ў віно, таксама і ў наш час здзейсніцца цуд усталявання міру, калі мы будзем паслухмянымі словам Езуса: „Будзьце дасканалымі, як дасканалы ёсць ваш нябесны Айцец“.
Быць дасканалым азначае жыць згодна з Божай праўдай», — настаўляў тэрцыярыяў заслужаны беларускі іерарх.
На заканчэнне арцыбіскуп Тадэвуш Кандрусевіч заахвоціў беларускую сям’ю Францішканскага ордэна свецкіх «браць прыклад са Святой Тройцы, з Панны Марыі і ў духу вернасці харызме святога Францішка Асізскага дапамагаць людзям імкнуцца да дасканаласці ў любові, якая творчая і якая будуе новы справядлівы свет».
