У нядзелю 5 чэрвеня, ва ўрачыстасць Спаслання Духа Святога, Мітрапаліт Мінска-Магілёўскі арцыбіскуп Юзаф Станеўскі наведаў парафію Маці Божай Бялыніцкай у Бялынічах, што на Магілёўшчыне.
У горадзе, дзе калісьці знаходзіўся адзін з найбольш шанаваных на нашых землях цудадзейных абразоў Багародзіцы, пастыр Мінска-Магілёўскай архідыяцэзіі ўдзяліў мясцовым вернікам сакрамэнт канфірмацыі.
Каля невялічкай парафіяльнай капліцы іерарха сустрэлі хлебам-соллю бялыніцкія католікі на чале са сваім пробашчам ксяндзом Юзафам Сярпейкам.
Падчас святой Імшы, цэлебрацыю якой узначаліў арцыбіскуп Станеўскі, ён маліўся ў інтэнцыі ўсёй парафіі, прысутных на ўрачыстасці святароў, а таксама за дабрадзеяў і аб паспяховым адраджэнні санктуарыя Маці Божай Бялыніцкай.
У прамоўленай гаміліі арцыбіскуп узгадаў словы Папы Францішка пра важнасць цаніць цяперашнюю хвіліну, магчымасці і чалавека, які цяпер побач.
«Мы маем спакусу вяртацца думкамі ў мінулае. Аднак нам належыць зразумець, што не будзе ўжо так, як было ў мінулым. Не будзе такога Касцёла, які быў у мінулым — і да выпрабавання пандэміяй каранавіруса і таго, які быў нашмат раней. Езус кажа нам захоўваць Яго вучэнне, а Дух Святы нам аб гэтым нагадвае ўвесь час, у сённяшні час», — падкрэсліў арцыпастыр.
«Сёння вы таксама можаце мець спакусу думаць, якая парафія была раней, колькі вернікаў і пілігрымаў сыходзілася ў касцёл у часы велічы культу Найсвяцейшай Панны Марыі Бялыніцкай. Аднак жыць трэба сённяшнім днём, маючы перад сабою мэту будаваць Божае Валадарства цяпер і тут, сярод гэтых людзей. Трываючы ў вучэнні Хрыста і слухаючыся натхненняў Духа Святога, вы заўважыце, што кожны, хто сустрэнецца з вамі і паразмаўляе нават хвіліну, будзе ведаць, што вы з Бялынічаў. Вас будзе характарызаваць тая выключная сувязь з Богам, якая здабываецца менавіта сёння. Сёння — гэтае слова азначае выключнасць кожнага моманту жыцця, якое дае нам Стварыцель.
Бялыніцкая іскра выйдзе з вашай невялікай супольнасці. Мы можам пытацца, ці гэта магчыма? Магчыма, бо нават з дванаццаці апосталаў нарадзіўся Касцёл, які мае такую вялікую колькасць паслядоўнікаў.
„Дух вее, дзе хоча“. Малюся, каб і вы адчувалі Яго пастаянную прысутнасць сярод вас у ціхім павеве ветру», — запэўніў бялыніцкіх вернікаў і іх душпастыра іерарх.
Сакрамэнт канфірмацыі ва ўрачыстасць Спаслання Духа Святога прынялі ў Бялынічах дзевяць асобаў. За ўдзелены сакрамант хрысціянскай сталасці яны скіравалі арцыбіскупу Юзафу Станеўскаму словы шчырай падзякі.
