12 красавіка пробашч парафіі Маці Божай Будслаўскай у Мінску ксёндз канонік Францішак Рудзь разам са студэнтамі Беларускага дзяржаўнага ўніверсітэта наведаў сталічную праваслаўную парафію Свяціцеля Мікалая Японскага.
Наведванне праваслаўнай парафіі адбылося ў межах праекту Беларускага дзяржаўнага ўніверсітэта «Дыялог культур і рэлігій», скіраванага на вывучэнне гісторыі з’яўлення, развіцця і дзейнасці вядучых канфесій у Рэспубліцы Беларусь.
У наведанай гэтым разам праваслаўнай парафіі служэнне нясуць протаіерэй Павел Сердзюк, іерэй Сергій Цімашэнкаў, іерэй Гардзей Шчаглоў, іерэй Аляксей Масесаў, іерэй Яўген Фісенкін.
Удзельнікі мерапрыемства даведаліся пра гісторыю супольнасці, узялі ўдзел у малітве за развіццё і росквіт Беларускага дзяржаўнага ўніверсітэта, які сёлета адзначае сваё стагоддзе, пазнаёміліся з выдавецкай дзейнасцю Праваслаўнай Црквы ў Беларусі.
У межах дыскусіі святары і студэнты абмеркавалі беларуска-японскія культурныя сувязі, царкоўную адукацыю, перспектывы развіцця каліграфіі на аснове старажытнарускага пісьма, дзейнасць школы практычнай генеалогіі.
Ксёндз Францішак Рудзь падараваў у бібліятэку парафіі кнігі «Касцёлы Беларусі» Станіслава Янчарскага.
Праект «Дыялог культур і рэлігій» бярэ свой пачатак з 2021 года, і за гэты час ужо адбылося больш за 40 мерапрыемстваў з удзелам прадстаўнікоў каталіцкай, праваслаўнай, юдэйскай і мусульманскай канфесій. Каталіцкі Касцёл у Беларусі з’яўляецца актыўным удзельнікам праекту, падтрымлівае ініцыятывы вядучай ВНУ краіны і студэнцтва.
