Рашэннем Мітрапаліта Мінска-Магілёўскага арцыбіскупа Юзафа Станеўскага з 10 красавіка ў Мінска-Магілёўскай архідыяцэзіі адклікаецца дыспенса ад абавязку ўдзелу ў святой Імшы ў нядзелю і абавязковыя ўрачыстасці, якая дзейнічала з кастрычніка 2020 года.
Адпаведны Дэкрэт быў падпісаны арцыбіскупам Станеўскім 29 сакавіка.
Такім чынам, пачынаючы з Пальмовай нядзелі, усе вернікі Мінска-Магілёўскай архідыяцэзіі абавязана асабіста, а не анлайн, браць удзел у святой Імшы ў нядзелі і абавязкаовыя ўрачыстасці.
У дакуменце, між іншым, сказана:
«Згодна з канонам 93 Кодэкса кананічнага права, гэтым дэкрэтам з 10 красавіка 2022 года спыняю дзеянне дэкрэта № 40/д/20 ад 15 кастрычніка 2020 года і адклікаю даспенсу ад абавязку ўдзелу ў нядзельнай і святочнай святой Імшы.
Пры гэтым да заканчэння пандэміі застаюцца ў сіле іншыя абмежаванні і рэкамендацыі, выдадзеныя кампетэнтнай уладай, якія датычацца захавання санітарных нормаў пры правядзенні набажэнстваў», — сказана ў Дэкрэце, падпісаным арцыбіскупам Юзафам Станеўскімі канцлерам Мітрапалітальнай курыі ксяндзом канонікам Дзмітрыем Пухальскім.
Канцлер курыі просіць святароў архідыяцэзіі давесці змест Дэкрэта да ведаму вернікаў.
