![](/3/images/news/2022/03/14457/2022-03-29-DSC00344-bw.jpg)
Беларуская Кустодыя Ордэна Меншых Братоў Капуцынаў са смуткам паведамляе, што 29 сакавіка на 81-м годзе жыцця адышоў у вечнасць брат Пётр Ясевіч OFMCap, шматгадовы пробашч парафіі святога Яна Хрысціцеля ў Валкалаце (Віцебская дыяцэзія).
Пахаванне брата Пятра Ясевіча OFMCap адбудзецца ў чацвер, 31 сакавіка.
- 11.00 – пахавальная святая Імша з ютранню за памерлых у касцёле ў Валкалаце
- Пасля Імшы — пахаванне на прыкасцёльным цвінтары
Пётр Ясевіч нарадзіўся 29 чэрвеня 1941 года на Ашмяншчыне ў каталіцкай сям’і Браніслава і Ядвігі Ясевічаў. Пасля заканчэння сярэдняй школы праходзіў тэрміновую вайсковую службу. Пасля арміі пэўны час працаваў кіроўцам у будаўнічай арганізацыі.
Адчуўшы пакліканне да святарства, паступіў у духоўную семінарыю ў Рызе. У 1984 годзе падпольна ўступіў у Ордэн Меншых Братоў Капуцынаў, прынёсшы ў Ліпнішках манаскія абяцанні.
Пасля заканчэння семінарыі 31 мая 1987 года прыняў прэзбітэрскае пасвячэнне і быў скіраваны на служэнне ў парафію святога Андрэя, апостала, у Крывічах. З 1988 года нёс душпастырскае служэнне ў парафіі святога Яна Хрысціцеля ў Валкалаце, у якой заставаўся пробашчам да 2009 года.
У апошнія гады цяжка хварэў і мог перамяшчацца толькі на інвалідным вазку.
Вечны адпачынак дай яму, Пане…