25 сакавіка, ва ўрачыстасць Звеставання Пана, у катэдральнай базыліцы святога Францішка Ксавэрыя ў Гродне прайшло набажэнства, падчас якога быў здзейснены Чын прысвячэння Расіі і Украіны Беззаганнаму Сэрцу Марыі.
Як паведаміла Прэс-служба Гродзенскай дыяцэзіі, супольная малітва ў катэдры распачалася набажэнствам Крыжовага шляху, якое правялі ў гэты дзень прадстаўнікі дыяцэзіяльнага Душпастырства цвярозасці.
Потым адбылася святая Імша, цэлебрацыю якой узначаліў біскуп Гродзенскі Аляксандр Кашкевіч. На пачатку літургіі іерарх заахвоціў вернікаў да руплівай малітвы ў інтэнцыі міру ва ўсім свеце, а асабліва ва Украіне.
Як заўважыў пастыр Касцёла на Гродзеншчыне, без міру на зямлі мы не пабудуем будучыні і не будзем поўнасцю шчаслівымі.
У гаміліі вікарый катэдральнай парафіі ксёндз Яўген Амасёнак заклікаў прысутных у святыні і тых, хто духоўна далучыўся да іх з дапамогай сродкаў масавай камунікацыі, прысвяціць свае сэрцы Пану Богу, аддаўшы ў Яго рукі ўсе нашы штодзённыя справы.
Святар адзначыў, што мір у свеце залежыць ад кожнага чалавека. «Таму трэба, каб у кожнага з нас была перакананасць, што ад мяне залежыць лёс не толькі мой і маіх блізкіх, але і лёс усяго свету», — дадаў ксёндз Амасёнак.
Завяршылася Імша выстаўленнем Найсвяцейшага Сакрамэнтy.
Падчас адарацыі біскуп Кашкевіч у духоўнай еднасці са Святым Айцом Францішкам і ўсім паўсюдным Касцёлам здзейсніў Чын прысвячэння Расіі і Украіны Беззаганнаму Сэрцу Марыі.
