У нядзелю 20 лютага ў парафіяльным касцёле Найсвяцейшай Тройцы ў Індуры (дэканат Гродна-Захад) з удзелам біскупаў ушанавалі памяць айца Казіміра Жыліса, езуіта, даручыўшы спачылага святара Божай Міласэрнасці ў першую гадавіну яго смерці.
Як нагадвае сайт Grodnensis.by, спачылы святар быў пробашчам гэтай парафіяльнай супольнасці ў 1983–2000 гадах.
На Эўхарыстыі сабраліся шматлікія вернікі, каб дзякаваць Богу за ўсё дабро, якое спазналі праз служэнне руплівага душпастыра, спачылага год таму, які вельмі шмат зрабіў для мясцовых парафіянаў і вернікаў навакольных парафій.
Цэлебрацыю святой Імшы ўзначаліў выхаванец айца Казіміра Мітрапаліт Мінска-Магілёўскі арцыбіскуп Юзаф Станеўскі. Канцэлебравалі Эўхарыстыю біскуп Гродзенскі Аляксандр Кашкевіч і прысутныя святары.
Усіх сабраных прывітаў сённяшні пробашч індурскай парафіі ксёндз Павел Астукевіч. Душпастыр адзначыў, што мясцовыя вернікі вельмі ўдзячныя айцу Жылісу, які шмат гадоў з вялікай адданасцю служыў ім і клапаціўся аб святыні.
У гаміліі арцыбіскуп Станеўскі адзначыў, што айцец Казімір, які ўвайшоў у гісторыю індурскай парафіі і Гродзенскай дыяцэзіі, меў сэрца, адданае Божай волі, і ахвяраваў сваё жыццё Пану, служачы людзям днём і ноччу. Іерарх падкрэсліў, што, прынесшы ў ахвяру ўсё сваё жыццё, айцец Казімір паказаў такім чынам, што Бог заўсёды быў для яго першым і найважнейшым.
Пасля Імшы арцыбіскуп Станеўскі благаславіў прысвечаную спачыламу святару мемарыяльную дошку, усталяваную на сцяне касцёла.
Такім чынам духавенства, сёстры законныя, якія служаць у парафіі, і вернікі пажадалі выказаць удзячнасць былому пробашчу, каб памяць пра яго заставалася жывой, і каб наступныя пакаленні не забываліся, што вера на гэтай зямлі захавалася дзякуючы таксама рупліваму служэнню айца Казіміра Жыліса.
