У нядзелю 20 лютага арцыбіскуп эмерыт Тадэвуш Кандрусевіч узначаліў цэлебрацыю святой Імшы ў катэдральным касцёле святых апосталаў Пятра і Паўла ў Саратаве (Расія).
Заслужаны беларускі іерарх наведаў каталіцкую дыяцэзію святога Клімэнта ў Саратаве па запрашэнні яе пастыра біскупа Клеменса Пікеля. На Паволжы арцыбіскуп Кандрусевіч браў удзел у Дні кансэкраванага жыцця, які 16–17 лютага праходзіў у горадзе Марксе.
На развітанне арцыпастыр разам са сваім расійскім сабратам біскупам Пікелем цэлебраваў святую Імшу ў саратаўскай катэдры.
У 1992 годзе арцыбіскуп Кандрусевіч, які ў той час нёс пастырскае служэнне ў Маскве, благаславіў крыж на тым месцы, дзе цяпер узвышаецца саратаўская каталіцкая катэдра. Сёння гэты крыж захоўваецца ў святыні ў памяць пра адраджэнне касцёльнага жыцця на Паволжы.
Пасля Эўхарыстыі беларускі іерарх сустрэўся з мясцовымі парафіянамі.
