9 студзеня ў Бабруйску прайшоў сёмы Сямейны баль, у якім узялі ўдзел сужэнскія пары з розных мясцін.
Незвычайная імпрэза, якая стала ўжо добрай традыцыяй, з’яўляецца ініцыятывай дабрачыннага фонду абароны жыцця і сям’і «Адкрытыя сэрцы».
У сёлетнім калядным балі ўзялі ўдзел восем сужэнскіх пар.
Тры гадзіны танцаў у канцэртнай зале бабруйскага санаторыя прайшлі ў атмасферы рамантыкі, шчырай радасці, узаемнай зацікаўленнасці і любові.
Удзельнікі рамантычнай імпрэзы вельмі ўдзячныя вядучым балю Уладзіславу і Алене Валаховічам, арганізатарам балю Галіне і Віталію Паўленкам, а таксама ўсім аднадумцам за сведчанне галоўных прынцыпаў сямейных каштоўнасцяў, прыклад веры і любові.
