2 лютага, у свята Ахвяравання Пана, што ў народзе называюць таксама Грамніцамі, арцыбіскуп эмерыт Тадэвуш Кандрусевіч узначаліў цэлебрацыю адпустовай святой Імшы ў капліцы Хрысціянскага сацыяльнага цэнтра.
Капліца пад тытулам Ахвяравання Пана — адзінае месца культу ў Мінска-Магілёўскай архідыяцэзіі, прысвечанае Маці Божай Грамнічнай.
Падчас Эўхарыстыі яе ўдзельнікі разам з заслужаным іерархам асаблівым чынам маліліся за ахвярадаўцаў і за ўсіх людзей добрай волі, якія прычыніліся да ўзвядзення капліцы. У малітвах узгадалі дабрадзеяў, якія дапамаглі ў ажыццяўленні задумы і ўжо адышлі ў вечнасць.
Маліліся таксама за Бацькаўшчыну, за духоўнае адраджэнне нашага народа, за ўсіх родных і блізкіх, супрацоўнікаў, падапечных і сяброў Хрысціянскага сацыяльнага цэнтра.
На пачатку святой Імшы адбылося традыцыйнае благаслаўленне грамнічных свечак.
У прамоўленай гаміліі арцыбіскуп Кандрусевіч звярнуў увагу на асоб, якія прысутнічалі пры Ахвяраванні Пана ў ерузалемскай святыні: старца Сімяона і прарочыцу Ганну, адзначыўшы, што яны вучаць нас вытрымцы.
«Такая вытрымка патрэбна кожнаму з нас. Усё нашае жыццё — гэта час чакання ажыццяўлення нашых планаў, аб чым мы просім Божай дапамогі. Аднак гэта не заўсёды адбываецца. Тады насоўваецца пытанне: ці Бог нас не пакінуў? Ці не забыўся Ён пра нас?
Не, Бог не забыўся. Божыя думкі — не нашыя думкі; і не заўсёды тое, чаго просім, служыць нашаму дабру і збаўленню. Таму не трэба наракаць на Бога, але трывала чакаць, як чакалі Сімяон і Ганна», — заахвоціў прысутных арцыпастыр. Ён дадаў, што чаканне павінна вучыць нас вытрымцы, а таксама звярнуў увагу на святло Духа Святога, якое сімвалізуюць грамнічныя свечкі.
«Каб знайсці тое, чаго шукаем, неабходна святло. У нашым жыцці такім святлом з’яўляецца вучэнне Евангелля. Без гэтага святла ўсе нашыя намаганні застануцца ў цемры страху і безраднасці.
Сімвалам прыняцця такога святла з’яўляецца грамнічная свечка, якая благаслаўляецца ў свята Божай Маці Грамнічнай.
Падчас сакрамэнту хросту ў нашых душах запаліўся агеньчык веры. Гэта тая свечка, якая вядзе нас па жыцці. Яна павінна гарэць заўсёды. Нельга дазволіць, каб яна згасла», — падкрэсліў заслужаны іерарх
Арцыбіскуп Тадэвуш Кандрусевіч пажадаў прысутным вернікам — дарослым і дзецям, выхаванцам Хрысціянскага сацыяльнага цэнтра, — каб грамнічная свечка заўсёды нагадвала ім пра хрысціянскі абавязак быць святлом свету, а трывалая малітва і хрысціянскае сведчанне каб асвятлялі шлях да неба.
