Адзінаццаты раз сабраў у Івянцы аматараў калядных спеваў арганізаваны айцамі францішканамі «Калядны фэст», які адбыўся 15 студзеня.
Нягледзячы на моцны вецер і мароз, зала івянецкага Дома культуры гасіцнна прыняла ахвотных паслухаць калядныя спевы ў выкананні як маленькіх, так і дарослых удзельнікаў.
Сёлетні «Калядны фэст» быў адметны перадусім сваімі цудоўнымі выканаўцамі.
Пасля ўступнага слова арганізатараў каляднай радасцю дзяліліся выступоўцы з Івянца: хор парафіі святога Міхала Арханёла, ансамблі івянецкага Дома культуры «Журавінка» і «Жамчужынка». Парадавалі прысутных і самыя маленькія ўдзельнікі фэсту. Дзіцячы хор івянецкай парафіі падрыхтаваў невялікае прадстаўленне пра тое, як людзі розных прафесіі і народаў вітаюць Збаўцу, а «ваўчаняты» — наймаладзейшыя ўдзельнікі скаўцкага руху — цэлай «зграяй» выбеглі на сцэну з каляднай зоркай.
Госці на «Калядны фэст» прыбылі ў Івянец і зблізку, і здалёк. Радасцю ад Нараджэння Збаўцы дзяліліся маладзечанскі хор парафіі святога Казіміра і дзіцячы гурт Transitus парафіі святога Францішка са сталічнага мікрараёна Новая Баравая. Абодва гэтыя калектывы паходзяць з капуцынскіх парафій, таму францішканскі дух фестывалю быў вельмі адметным. Ён увасобіўся нават у імправізаваным стэндапе пра ролю каптура ў капуцынска-францішканскім жыцці.
Акрамя хораў, у фестывалі ўзялі ўдзел і іншыя выканаўцы.
Сваёй творчасцю і радасцю падзяліліся з прысутнымі спявачка Вольга Хілько і паэтка Алена Казловіч-Усцілоўская. Ядзя Багдановіч з гітарыстам El’Quint выканалі свае новыя аўтарскія спевы, а дзіцячы гурт «Міхаэлькі» з мінскай парафіі Маці Божай Ружанцовай апроч спеваў прадставіў гледачам традыцыйную калядную Батлейку ва ўласным выкананні.
На заканчэнне фестывалю Алесь Чумакоў і Таццяна Ячная, сапраўдныя сучасныя барды, пад акампанемент гусляў запрасілі прысутных у музычнае падарожжа па сонечных краях Італіі, Іспаніі і Венесуэлы, выконваючы па-беларуску калядкі са сваёй новай святочнай праграмы.
Як і штогод, фестываль у Івянцы наведалі цудоўныя госці. Нават дырэктар Catholic.by быў заўважаны на сцэне падчас аднаго з выступаў у якасці перкусіяніста і дырыжора.
Асаблівым чынам варта адзначыць выдатных вядучых з «Радыё Марыя», якія імгненны знаходзілі кантакт з залай, арыгінальна распавядаючы паміж выступамі пра кожнага з выканаўцаў. Дзякуючы намаганням «Радыё Марыя» кожны мог далучыцца да фестывалю анлайн праз аўдыётрансляцыю і прамы эфір у інстаграме.
Госці, падзяліўшыся каляднай радасцю, падсілкаваўшыся прысмакамі, што прыгатавалі гасцінныя івянецкія парафіяне з душпастырамі, доўга развітваліся, каб праз год сустрэцца ўжо ў дванаццаты раз у калядным Івянцы.
