![](/3/images/news/2022/01/2022-01-04-q0cilydzw2yd6n00r0ax8pqpi0qv4qyl.jpg)
5 студзеня ў касцёле святога Сымона і святой Алены ў Мінску (Чырвоны касцёл) адбудзецца пахавальная святая Імша за спачылага Адама Мальдзіса — вядомага беларускага літаратуразнаўцу, гісторыка, пісьменніка, журналіста.
Адам Мальдзіс адышоў у вечнасць 3 студзеня на 90-м годзе жыцця.
Пахавальную цэлебрацыю ўзначаліць арцыбіскуп эмерыт Тадэвуш Кандрусевіч.
Пачатак у 11.00.
Адначасова будзе весціся прамая трансляцыя з Чырвонага касцёла.
Адам Мальдзіс нарадзіўся 7 жніўня 1932 гады ў вёсцы Расолы Ашмянскага павета ў каталіцкай сям’і. Скончыў факультэт журналістыкі Беларускага дзяржаўнага ўніверсітэта, а пасля працаваў сакратаром у радашковіцкай раённай газеце. У 1962 годзе скончыў аспірантуру пры Інстытуце літаратуры імя Янкі Купалы Акадэміі навук БССР, пазней працаваў навуковым супрацоўнікам. Кандыдацкую дысертацыю абараніў у 1963 годзе. З 1991 па 1998 год працаваў дырэктарам Нацыянальнага навукова-асветніцкага цэнтру імя Францыска Скарыны. У тым жа годзе (1991) быў абраны прэзідэнтам Міжнароднай асацыяцыі беларусістаў. З 1996 года з’яўляўся кіраўніком аддзела культуралогіі Міжнароднай акадэміі навук Еўразіі.
Адам Мальдзіс вядомы і як сябра пісьменніка Уладзіміра Караткевіча. Ён не раз расказваў аб цёплых сяброўскіх адносінах, якія ў іх склаліся. Пісьменнік і крытык доўгі час жылі па суседстве. Літаратуразнаўца з’яўляецца аўтарам кнігі «Жыццё і ўзыходжанне Уладзіміра Караткевіча», якая выйшла ў 1990 годзе.
Акрамя таго, менавіта Адам Мальдзіс распачаў шматлікія даследаванні ў галіне гісторыі беларускай літаратуры і культуры.
Спачылы быў веруючым католікам, яго публікацыі друкаваліся ў часопісе «Наша вера».