У Бялынічах — месцы, дзе калісьці захоўваўся цудудзейны абраз Маці Божай Бялыніцкай — у свята Святой Сям’і, якое сёлета адзначалася 26 снежня, адбылася Калядная сустрэча сем’яў.
Яна прайшла ў межах абвешчанага Папам Францішкам Года сям’і Amoris Lætitia.
Святкаванне распачалося цэлебрацыяй святой Імшы ў інтэнцыі сем’яў бялыніцкай парафіяльнай супольнасці і ўсіх тых, хто пілігрымуе да Каралевы Беларусі.
Другая частка Каляднай сустрэчы адбылася ў кафэ і мела адукацыйна-забаўляльны характар. Сюды былі запрошаны не толькі каталіцкія сем’і, але і ўсе ахвотныя з горада і ваколіц.
Напачатку дарослыя парафіяне прадставілі спектакль пра Божае Нараджэнне.
Адметным было тое, што найстарэйшая «акторка», якая брала ўдзел у пастаноўцы, Алла Абразцова, мае 82 гады.
Спектакль меў вялікі поспех у гледачоў, і парафіяне плануюць прадставіць яго ў Доме састарэлых і ў Доме дзяцей-сірот у Магілёве.
Аніматары мерапрыемства сям’я Віталя і Галіны з Бабруйска правялі дзяцей па «мапе выпрабаванняў» з мэтай, пераадолешўы перашкоды, знайсці святога Мікалая з падарункамі. Гульні былі скіраваныя на інтэграцыю дзяцей паміж сабою.
Апрача падарункаў, які атрымала кожнае дзіця, былі падведзены вынікі конкурсу на стварэнне генеалагічнага дрэва свайго роду, аб’яўленага на парафіяльнай інстаграм-старонцы @parafia_belynichi.
Мэтай конкурсу было праз успамін продкаў паглыбіць сувязь пакаленняў і навучыцца цаніць бліжніх, пакуль яны жывыя.
У выніку ўдзельнікі згаданага конкурсу таксама атрымалі ўзнагароды.
Арганізатары калядных мерапрыемстваў у Бялынічах выказваюць словы падзякі ўсім ахвярадаўцам парафіі.
