30 лістапада, у свята святога апостала Андрэя ў санктуарыі Гродзенскай дыяцэзіі Маці Божай Каралевы нашых сем’яў у Тракелях прайшла фармацыйная сустрэча для духавенства Гродзенскай дыяцэзіі да пяці гадоў святарства.
Як паведаміла Прэс-служба Гродзенскай дыяцэзіі, у сустрэчы, якая зноў адбылася пасля працяглага эпідэмічнага перапынку, удзельнічалі восем маладых святароў.
Падчас сустрэчы цэлебрацыю Імшы ў дыяцэзіяльным санктуарыі ўзначаліў біскуп Гродзенскі Аляксандр Кашкевіч.
На пачатку Эўхарыстыі іерарх падкрэсліў, што трэба нястомна дзякаваць Богу за дар паклікання, якім Пан адарыў кожнага святара.
У прамоўленай гаміліі ксёндз канонік Павел Салабуда, які нядаўна быў прызначаны мадэратарам пастаяннай фармацыі маладых святароў Гродзенскай дыяцэзіі і ў першы раз арганізаваў такую сустрэчу, засяродзіўся на тым, як выкарыстаць час Адвэнту для асабістага дыялогу з Богам. Святар падкрэсліў, што падчас штодзённага выканання сваіх душпастырскіх абавязкаў варта на адвэнтавым шляху спыніцца на хвіліну і зірнуць на сваё жыццё, а таксама пастаянна дзякаваць Богу за тое, што з’яўляешся святаром, пасланым, каб несці людзям радасць Евангелля.
З дакладам на тэму «Сродкі сацыяльнай камунікацыі ў душпастырстве» выступіў пробашч парафіі святога Міхала Арханёла ў Навагрудку ксёндз доктар Юрый Жэгарын.
Святар звярнуў увагу на тое, што інтэрнэт можа быць толькі прыладай першаснага кантакту, якая павінна весці да сапраўднай міжперсанальнай камунікацыі, а таксама служыць перадачы сацыяльна значнай інфармацыі, напрыклад, у арганізацыйных справах.
Святар адзначыў, што ёсць дзвe асноўныя мэты карыстання сродкамі сацыяльнай камунікацыі: актывізацыя ўласнай парафіяльнай супольнасці і пошук новых людзей, a рэалізацыя гэтага — вельмі працаёмкі працэс, які патрабуе пэўных навыкаў.
Па словах ксяндза Жэгарына, сацыяльныя сеткі можна ўспрымаць вельмі інструментальна, як прыладу, якая можа адрасна, у рэальнай камунікацыі, дапамагчы чалавеку. Святар дадаў, што той, хто ажыццяўляе перадачу і мае намер прывесці чалавека да рэальнай камунікацыі, сам павінен быць дастаткова сацыялізаваным і камунікабельным.
