21 лістапада, ва ўрачыстасць Пана нашага Езуса Хрыста, Валадара Сусвету, у мікрараёне Баранавічы ў Гродне біскуп Гродзенскі Аляксандр Кашкевіч благаславіў зямлю пад будаўніцтва новага касцёла і ўсталяваны на ёй крыж.
Як паведамляе Grodnensis.by, на ўрачыстасці сабраліся вернікі парафіі благаслаўлёнай Мар’яны Бярнацкай, якія разам са сваім пробашчам ксяндзом Юрыем Марціновічам з малітвай распачалі справу пабудовы парафіяльнай святыні, а таксама госці, сярод якіх былі святары, сёстры законныя, прадстаўнікі суседняга праваслаўнага прыхода на чале са сваім настаяцелем.
У намёце на месцы, дзе будзе ўзведзены касцёл благаслаўлёнай Мар’яны, адбылася першая святая Імша, цэлебрацыю якой ўзначаліў біскуп Кашкевіч.
Вітаючы іерарха, прадстаўнікі парафіі падкрэслілі, што для іх гэта гістарычная хвіліна, а гэты дзень упішацца ў гісторыю маладой парафіі, апякункай якой з’яўляецца благаслаўлёная Мар’яна Бярнацкая — смелая жанчына, мужная хрысціянцы і гераічная мучаніца.
