![](/3/images/news/2021/11/2021-11-05-IMG_7365.jpg)
29 кастрычніка салезіянская сям’я Беларусі сабралася ў вёсцы Дварэц Дзятлаўскага раёна, каб памаліцца за памерлых сабратоў.
Як нагадвае сайт салезіянаў ксяндза Боско ў Беларусі sdb.by, Дварэц — гэта месца, дзе 100 гадоў таму салезіяне распачалі сваю дзейнасць на тэрыторыі сучаснай Беларусі. Таму невыпадкова, што на традыцыйную малітоўную сустрэчу, прысвечаную памяці аб памерлых сабратах, салезіяне сабраліся менавіта ў гэтай вёсцы.
![](/3/images/news/2021/11/2021-11-05-IMG_7292.jpg)
Сустрэча распачалася са святой Імшы, якую ўзначаліў рэгіянальны настаяцель салезіянскага таварыства на Беларусі ксёндз Віктар Гайдукевіч SDB.
Напачатаку дэлегат прывітаў усіх прысутных сабратоў, сясцёр салезіянак, салезіянаў супрацоўнікаў і мясцовых вернікаў, некаторыя з якіх яшчэ памятаюць дзейнасць салезіянаў у сваёй парафіі.
Асаблівыя словы ўдзячнасці ксёндз Віктар скіраваў да мясцовага пробашча Паўла Скубы, які гасцінна прымае салезіянаў у сваёй парафіі. Пасля ксёндз Артур Ляшнеўскі SDB зачытаў імёны памерлых салезіянаў, якія працавалі на нашай зямлі, і за якіх цэлебруецца святая Імша.
![](/3/images/news/2021/11/2021-11-05-IMG_7231.jpg)
Казанне да прысутных прамовіў дырэктар салезіянскай супольнасці ў Мінску і дэкан дэканату Мінск-Усход ксёндз Аляксандр Мятліцкі SDB. Разважаючы над Евангеллем, святар звярнуў увагу на тое, што кожны чалавек на працягу жыцця рыхтуецца да спаткання з «Жаніхом», як і панны, якія з алеем чакалі ўваходу на вяселле. Кожны з нас ведае дату свайго нараджэння, але ніхто не ведае, калі адыдзе ў вечнасць, таму да гэтага пераходу трэба быць падрыхтаваным заўсёды, сваім жыццём і сваімі ўчынкамі.
«З чым мы станем перад абліччам нашага Нябеснага Жаніха Езуса Хрыста, які прыйшоў нас збавіць? Ці вартыя мы будзем атрымаць тое вечнае святло, якое Ён падрыхтаваў для нас у небе?» — задаў пытанне прысутным ксёндз Аляксандр, і падкрэсліў, што, успамінаючы памерлых, варта маліцца за спачылых святароў і братоў законных, каб яны праз сваё заступніцтва дапамаглі і нам увайсці ў Валадарства Нябеснае.
Пасля Імшы прысутныя памаліліся каля магіл ксяндза Людвіка Віткоўскага SDB і сабратоў каад’ютараў Стэфана Залеўскага SDB і Казіміра Ляхоўскага SDB, а потым скіраваліся ў Дзятлава, дзе быў благаслаўлёны адноўлены помнік на магіле ксяндза Яна Вялькевіча SDB.
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)