3 лістапада, як гэта традыцыйна адбываецца на працягу актавы малітваў за ўсіх памерлых вернікаў, у катэдральным касцёле Найсвяцейшага Імя Марыі ў Мінску прайшла малітва за спачылае духавенства Мінска-Магілёўскай архідыяцэзіі.
Святую Імшу ў гэтай інтэнцыі ўзначаліў новы Мітрапаліт Мінска-Магілёўскі арцыбіскуп Юзаф Станеўскі. Разам з арцыпастырам пры алтары галоўнай святыні беларускай сталіцы сабраліся ксяндзы канонікі архікатэдральнага капітулу, каб у супольнай малітве ўшанаваць памяць усіх тых, хто без рэшты прысвяціў сваё жыццё служэнню Хрысту і Яго святому Касцёлу ў Мінска-Магілёўскай архідыяцэзіі, перадусім за памерлага кардынала Казіміра Свёнтка, першага арцыбіскупа Мітрапаліта Мінска-Магілёўскага.
Да арцыбіскупа Станеўскага і канонікаў капітулу далучыліся вернікі катэдральнай парафіі ў Мінску, якія ўзялі ўдзел у святой Імшы за памерлых святароў.
