28 кастрычніка, ва ўспамін святых апосталаў Сымона і Юды Тадэвуша, арцыбіскуп эмерыт Тадэвуш Кандрусевіч наведаў Хрысціянскі сацыяльны цэнтр у Мінску, які займаецца выхаваннем дзяцей і падтрымкай найбольш уразлівых груп насельніцтва.
Як паведамляецца на сайце «Дабрачыннай мiсiі добрага самаранiна» Samaranin.by, пад апекай якой дзейнічае сацыяльны цэнтр, заслужаны іерарх завітаў сюды ў дзень сваіх імянінаў, каб памаліцца разам з дзецьмі, падапечнымі і супрацоўнікамі.
Прысутныя павіншавалі імянінніка, заспявалі песню і ўручылі падарунак, зроблены сваімі рукамі.
У капліцы цэнтра, у кастрычніку — месяцы ружанцовай малітвы — упрыгожанай ружанцамі, зробленымі рукамі выхаванцаў, — арцыбіскуп Кандрусевіч разам з духоўным апекуном цэнтра ксяндзом Аляксандрам Шамрыцкім МІС цэлебраваў Эўхарыстыю. Пасля святой Імшы арцыпастыр сустрэўся з удзельнікамі суполкі «Самаранін», створанай для падтрымкі людзей з абмежаванымі магчымасцямі і іх сем’яў.
У Хрысціянскі сацыяльны цэнтр, які быў створаны і дзейнічае дзякуючы руплівай працы сястры уршулянкі Чаславы Навіцкай USJK, імяніннік прыйшоў не з пустымі рукамі. Кожны ўдзельнік сустрэчы атрымаў ад арцыбіскупа ў падарунак абразок і салодкі пачастунак.
