З 18 па 20 ліпеня ў Браславе праходзілі арганізаваныя сёстрамі эўхарысткамі трохдзённыя рэкалекцыі для дзяўчат пад назваю «Паглядзі ў люстэрка», якія сабралі маладых удзельніц з розных куткоў Беларусі.
Сёстры эўхарысткі Таццяна Гмыза і Лена Панцялей прапанавалі ўдзельніцам «паглядзець у люстэрка» — менавіта так гучала тэма духоўных практыкаванняў. Паспрабаваць стаць у праўдзе парад сабой, Богам і іншымі людзьмі, пабыць сам-насам з Езусам у Гостыі, а таксама адпачыць прыехалі дзяўчаты з Полацка, Барысава, Астраўца, Пінска і Мінска. Былі, канечне, і мясцовыя маладыя верніцы.
Тры летнія дні ў Браславе былі напоўненыя духоўнымі размовамі, канферэнцыямі, асабістай працай, забавамі і прыемным адпачынкам на беразе возера.
Цэнтрам кожнага дня з’яўлялася святая Імша і адарацыя Найсвяцейшага Сакрамэнту. Быў вызначаны час і на тое, каб пабыць у цішыні і пашукаць адказы на пытанні: «Якая я насамрэч?» «Што думае пра мяне Пан Бог?» «Якая я ў Яго вачах?» «Хто для мяне Бог?» «Які вобраз Бога нашу ў сваім сэрцы?»
Пра тое, як прайшлі гэтыя незвычайныя тры дні (спойлер — вельмі цікава і насычана), дзеліцца блогер Ася Паплаўская на старонцы супольнасці сясцёр эўхарыстак Eucharystki.wordpress.com>>>
