На сёлетнім Будслаўскім фэсце, які праходзіць 2 і 3 ліпеня, можна набыць унікальныя сувеніры — своеасаблівыя «рэліквіі» майскага пажару ў Нацыянальным санктуарыі.
Выраб незвычайных памятак арганізаваў Caritas Мінска-Магілёўскай архідяцэзіі па прапанове брата Андрэя Жылевіча, капуцына.
Гэта кавалкі абвугленага дрэва, што засталося ад канструкцый знішчанага пажарам даху базылікі, з выявай Маці Божай Будслаўскай, а таксама аформленыя ў рамку кавалкі абпаленай медзі і вуглі ад бэлек.
Кожны такі сувенір унікальны і непаўторны. Іх дораць узамен за ахвяраванне ў памеры ад 10 да 50 рублёў. Усе сабраныя такім чынам сродкі пойдуць на аднаўленне будслаўскай святыні.
Каля шапікаў Дабрачыннага каталіцкага таварыства Caritas, размешчаных у парку насупраць уваходу ў плябанію, дзе можна набыць сувеніры, арганізавана дзіцячая пляцоўка. Тут наймалодшыя ўдзельнікі ўрачыстасці могуць пагуляць і весела правесці час з аднагодкамі.
Іх радасныя воклічы — найлепшае сведчанне таго, што жыццё ў санктуарыі працягваецца, і што святыня абавязкова зноў адродзіцца, а з вуголля паўстане новы прыгожы дах на доме нябеснай Матулі.
