У парафіі святога Яна Хрысціцеля, што ў Беняконях (Радунскі дэканат), адбыўся парафіяльны фэст, на які завітаў ганаровы госць — Генеральны вікарый Гродзенскай дыяцэзіі біскуп Юзаф Станеўскі.
Селетняя ўрачыстасць у мясцовай парафіі была асаблівай, бо больш за 40 чалавек, пераважна моладзь, прынялі з рук іерарха сакрамэнт канфірмацыі.
Яшчэ адной адметнасцю гэтага адпусту стала тое, што пробашч парафіі ў Беняконях ксёндз Станіслаў Лабан, нядаўна менаваны біскупам Аляксандрам Кашкевічам ганаровым канонікам Гродзенскага катэдральнага капітулу, упершыню з’явіўся перад вернікамі ў адпаведным кананіцкім строі. Намінацыйны дэкрэт зачытаў дэкан капітулу ксёндз канонік Генрых Яблонскі.
Вернікі з энтузіязмам прывіталі новага каноніка і пажадалі плённай працы свайму пробашчу.
Біскуп Юзаф Станеўскі, які ўзначаліў цэлебрацыю адпустовай святой Імшы, звяртаючыся да парафіяльнай супольнасці, асаблівым чынам вёў дыялог з моладдзю. Асновай для дыялогу стала паслясінадальная Апостальская адгартацыя Папы Францішка Christus Vivit — «Хрыстус жыве», напісаная Святым Айцом у форме ліста да моладзі. Іерарх заахвочваў моладзь зрабіць Касцёл маладым сваёй маладосцю, прысутнасцю у супольнасцях, актыўным удзелам у парафіяльным жыцці.
Адказны за моладзь у беларускім каталіцкім епіскапаце біскуп Станеўскі засяродзіў увагу на асобе апекуна парафіі ў Беняконях Святога Яна Хрысціцеля і, звяртаючыся да моладзі, зазначыў:
«Сёння ваш час абвяшчаць свету шляхі, якія вядуць да Бога і Касцёла, а не аддаляюць ад Яго. Вы ведаеце як гэта зрабіць: вы атрымалі моц з вышыні: будзьце ж адважнымі! Сваім жыццёвым прыкладам перамяняйце гэты свет, каб ён быў больш Божым, а значыць і больш чалавечным».
На заканчэнне парафіяльнай урачыстасці адбылася Эўхарыстычная працэсія.
