20 чэрвеня біскуп Юзаф Станеўскі скіраваў віншаванне з нагоды Дня медыцынскага работніка, які ў Беларусі адзначаецца ў трэцюю нядзелю першага месяца лета.
Паважаныя браты і сёстры ў белых халатах!
З нагоды Дня медыцынскіх работнікаў, які адзначаецца сёння ў нашай краіне, я хацеў бы выказаць вам шчырую ўдзячнасць і найлепшыя пажаданні. Мы заўсёды памятаем пра людзей, якія прафесійна займаюцца выратаваннем здароўя і жыцця іншых. Сёння мы асаблівым чынам скіроўваем нашыя думкі да ўрачоў, медсясцёр і медбратоў, акушэрак, фельчараў, фармацэўтаў і ўсіх іншых супрацоўнікаў бальніц і паліклінік, а таксама ўзносім за іх нашыя малітвы.
Дарагія медыкі, вы ўсе надзвычай важныя і патрэбныя! Мы гэта вельмі востра адчулі асабліва ў цяперашняй эпідэміялагічнай сітуацыі.
Больш за год вы прыкладаеце намаганні для барацьбы з эпідэміяй каранавірусу. Кожны дзень вы самааддана ратуеце гэты найкаштоўнейшы Божы дар — жыццё чалавека. Вы аказваеце дапамогу ў надзвычайных сітуацыях, звязаных са здароўем, і несяце неацэнную дапамогу людзям, якія апынуліся ў цяжкім стане.
Немагчыма знайсці словы, каб выказаць павагу і ўдзячнасць за вашу ахвяру для хворых і церпячых. Застаючыся на «першай лініі фронту» змагання з пандэміяй і ратуючы жыццё іншых людзей, вы выконваеце сваю місію і сваё пакліканне, часта рызыкуючы ўласным здароўем і жыццём.
Асабліва ў гэты цяжкі час пандэміі жадаю вам дабрыні, удзячнасці і разумення пацыентаў, іх сем’яў, падтрымкі з боку валанцёраў.
Пры алтары Пана мы сёння молімся за ўсіх вас, просячы Божай дапамогі, ласкі цярплівай настойлівасці ў барацьбе з «нябачным ворагам» і неабходныя сілы, каб клапаціцца пра хворага чалавека, які заўсёды мае сваю годнасць і правы.
Дарагія медыкі! Жадаю вам моцнага здароўя, задавальнення і шмат радасці пры выкананні гэтага выключна высакароднага служэння. Няхай святы Лука, апякун службы аховы здароўя, выпрасіць для вас і вашых сем’яў дапамогі ад Нябеснага Лекара — Езуса Хрыста.
Няхай Маці Божая, якую мы ўшаноўваем як Аздараўленне хворых, апякуецца ўсёй нашай Радзімай і нашым народам.
З благаслаўленнем ваш пацыент
біскуп Юзаф
