13 чэрвеня ў парафіі святога Антонія, што ў мікрараёне Малінаўка ў Мінску, адбылася ўрачыстасць тытулу касцёла, ў якой узяў удзел Апостальскі адміністратар sede vacante Мінска-Магілёўскай архідыяцэзіі біскуп Казімір Велікаселец.
Паказальна, што найстарэйшы каталіцкі біскуп у Беларусі не абмежаваўся ўдзелам толькі ў адной урачыстай цэлебрацыі.
На працягу ўсяго дня іерарх маліўся з вернікамі маладой малінаўскай парафіі: прамаўляў Божае слова на чатырох Імшах, спавядаў і благаслаўляў парафіянаў.
Многія вернікі, у тым ліку і з іншых парафій, спецыяльна ў гэты дзень наведалі касцёл святога Антонія, каб прывітаць свайго пастыра і паслухаць яго казанні.
Проста і даступна, на жыццёвых і літаратурных прыкладах біскуп Казімір Велікаселец тлумачыў Слова Божае, сілай сваёй малітвы ўсяляючы ў людзях надзею на духоўнае аднаўленне.
5 мая 2019 года у святыні адбылася першая святая Імша пасля «пераезду» з будынку раённага ЖЭСа. На сённяшні дзень дзякуючы ахвяраванням парафіянаў і дабрачынцаў у справе будаўніцтва святыні зроблена ўжо вельмі шмат: незадоўга да урачыстасці былі пабеленыя сцены касцёла, праведзеныя камунікацыі. Неўзабаве вернікаў будзе сустракаць і аздоблены фасад будынка.
Біскуп Казімір Велікаселец наведаў новапабудаваны касцёл святога Антонія ўпершыню.
Усе чатыры ўрачыстыя Імшы з яго ўдзелам былі ўпрыгожаныя спевамі ў суправаджэнні розных арганістаў Мінска. Асабліва парадаваў вернікаў дзіцячы хор «Міхаэлькі» з парафіі ў Лошыцы, які завітаў ў касцёл увечары.
Біскуп Казімір Велікаселец выказаў надзею на далейшае паспяховае развіццё маладой сталічнай парафіі, апекуном якой з’яўляецца святы Антоній.
