13 чэрвеня ў парафіі святога Антонія ў Слуцку адбылася адпустовая урачыстасць, на якую сабраліся не толькі мясцовыя вернікі, але і госці з Асіповічаў, Салігорска і Мінска.
Цэлебрацыю святой Імшы ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.
У гаміліі іерарх на прыкладзе святога Антонія адзначыў, што кожны чалавек пакліканы быць святым, а гэта значыць пакліканы ўвайсці ў Божае Валадарства. «Калі мы глядзім на святых, мы бачым, што магчыма ўвайсці ў Божае Валадарства і быць святым. Адзінае, што мы павінны зрабіць — гэта хацець!» — падкрэсліў біскуп. —
Кожны чалавек, незалежна ад таго, як і дзе ён жыў, стане калісьці прад тронам Хрыстовым і адкажа перад Богам за свае добрыя і дрэнныя ўчынкі. Божае Валадарства — гэта ўзнагарода за тое дабро, якое чалавек зрабіў у сваім жыцці. Кожны дзень мы робім розныя ўчынкі, часам можам памыляцца, зрабіць штосьці няправільна, але Езус кажа, што Ён міласэрны і заўсёды гатовы нам прабачыць.
<…> Езус Хрыстус параўноўвае Божае Валадарства з зернем. Бог кожнаму з нас даў зерне веры. Зярнятка веры толькі тады ўзрасце і прынясе ў нашым жыцці плён, калі мы будзем нястомна клапаціцца пра яго. А гэта працэс, які трывае ўсё жыццё», — адзначыў у гаміліі іерарх.
Біскуп Касабуцкі пажадаў усім прысутным, каб праз заступніцтва святога Антонія зярнятка веры прыносіла багаты плён у нашым жыцці і каб мы ўсе сустрэліся ў Божым Валадарстве.
На заканчэнне ўрачыстай святой Імшы адбылася працэсія вакол касцёла, падчас якой вернікі праслаўлялі і дзякавалі Богу за ўсе яго дары, а таксама прасілі праз заступніцтва святога Антонія неабходныя ласкі для збаўлення.
Згодна з традыцыяй, пасля святой Імшы быў благаслаўлёны хлеб, які нагадвае нам, што мы павінны быць, па прыкладу святога Антонія, міласэрнымі і добрымі і дзяліцца дабротамі з бліжнімі.
Парафіяне выказалі падзяку біскупу Юрыю за яго прысутнасць, супольную малітву, а таксама за пасеянае зерне слова, якое ўмацавала на дарозе да Божага Валадарства.
