У нядзелю 6 чэрвеня ў Баранавічах тутэйшыя католікі прайшлі ў Эўхарыстычнай працэсіі па цэнтральных вуліцах горада з нагоды ўрачыстасці Найсвяцейшага Цела і Крыві Хрыста.
Святкаванне распачалося святой Імшой у баранавіцкім санктуарыі Маці Божай Фацімскай.
Пасля Эўхарыстыя вернікі ўсіх пяці каталіцкіх парафій горада разам са святарамі і кансэкраванымі асобамі прайшлі ў працэсіі з Найсвяцейшым Сакрамэнтам па цэнтральных вуліцах свайго горада.
Па дарозе яны спыняліся каля чатырох падрыхтаваных парафіянамі алтароў, пры якіх адбываліся малітвы і чыталіся адпаведныя ўрыўкі з чатырох Евангелляў.
На працягу амаль дзвюх гадзін людзі разам маліліся, праслаўляючы Бога спевамі ў суправаджэнні духавога аркестру Баранавіцкага музычнага каледжа. Працэсія завяршылася супольнай малітвай з урачыстым спевам у касцёле Узвышэння Святога Крыжа — найстарэйшай каталіцкай святыні Баранавічаў.
