У дзень 30-годдзя свайго біскупскага пасвячэння, які прыпаў ва ўрачыстасць Спаслання Духа Святога, біскуп Гродзенскі Аляксандр Кашкевіч наведаў касцёл Узвышэння Святога Крыжа ў Лідзе.
Яу адзначаецца на партале Гродзенскай дыяцэзіі Grodnensis.by, для тутэйшых парафіянаў гэта быў радасны дзень, калі яны маглі не толькі маліцца за свайго пастыра, але і асабіста выказаць яму віншаванні.
Іерарх узначаліў у лідскай «фары» цэлебрацыю святой Імшы, падчас якой удзяліў сакрамэнт канфірмацыі групе вернікаў.
Біскуп падзякаваў бацькам, чые дзеці ў гэты дзень праз сакрамэнт хрысціянскай сталасці былі ўзбагачаны сямю дарамі Духа Святога, за клопат аб іх рэлігійным выхаванні і прыклад апостальскай руплівасці, дадзены ў родным доме.
Саміх новаканфірмаваных пастыр Гродзенскай дыяцэзіі заахвоціў супрацоўнічаць з ласкай Пана і добра выкарыстоўваць дары, якія паходзяць ад Божага Духа.
На заканчэнне Эўхарыстыі дзеці, моладзь і іншыя прадстаўнікі парафіі звярнуліся да біскупа Кашкевіча са шчырымі пажаданнямі. У 30-ю гадавіну біскупскага пасвячэння яны падаравалі іерарху святочны торт з яго біскупскім гербам.
Пробашч парафіі ксёндз канонік Уладзімір Гуляй выказаў удзячнасць біскупу, які ў гэты радасны дзень пажадаў дзяліцца Божай ласкай з лідскімі вернікамі.
