Пошук

19.05.2021 11:21   Фота: Алена Францкевіч, Брат Алег Шэнда OFMCap / Catholic.by

14 мая хор мінскай парафіі святога Францішка Transitus (Новая Баравая) узяў удзел у ХІІ міжнародным конкурсе «Благодарение», які праходзіць пад эгідай Міністэрства культуры Расійскай Федэрацыі на базе Арлоўскага дзяржаўнага інстытута культуры.

Парафіяльны калектыў выступаў у намінацыі «аматарскія спевы (акадэмічны вакал)». Абавязковымі ўмовамі ўдзелу ў конкурсе было выкананне песнапення духоўнай тэматыкі, аўтарскай апрацоўкі народнай песні і твора кампазітара класіка. Хор Transitus прадставіў на конкурсе спеў «Тры Ангалы» на беларускі духоўны верш у апрацоўцы манахіні Юліяніі Дзянісавай, «Песню пра Панскія Нарадзіны» на музыку Вацлава з Шамотул (беларускі паэт і кампазітар XVI ст.), і старадаўні эўхарыстычны спеў «Ave Verum» на музыку Моцарта.

На міжнародным конкурсе ў Расіі парафіяльны хор Transitus з Мінска быў адзіным прадстаўніком рыма-каталіцкай спеўнай традыцыі і ўдзельнічаў на аднолькавых умовах з усімі заяўленымі калектывамі: як свецкімі, так і рэлігійнымі.

Кваліфікаванае журы высока адзначыла выканальніцкія здольнасці хора з Беларусі. Парафіяльны калектыў Transitus быў узнагароджаны дыпломам лаўрэата ІІ ступені, а мастацкі кіраўнік хора Вераніка Раманенкава была асобна адзначана дыпломам лаўрэата ІІ ступені як харавы дырыжор.

Усе ахвотныя маюць магчымасць паслухаць выступленне хору Transitus, якое адбудзецца ў межах парафіяльнага фестывалю мастацтваў «Марыйны травень» 30 мая пасля святой Імшы на 11.00 у мінскім касцёле святога Францішка (мікрараён Новая Баравая).

 

Абноўлена 19.05.2021 11:24
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа