19 сакавіка, ва ўрачыстасць святога Юзафа, у парафіі Перамянення Пана ў Негарэлым прайшлі аднадзённыя велікапосныя рэкалекцыі.
Перыяд Вялікага посту, а асабліва рэкалецыйныя дні з’яўляюцца часам, калі кожны веруючы стараецца прыступіць да сакрамэнту пакаяння, бо, паводле касцёльнага наказа, вернік абавязаны спавядацца прынамсі раз у год і прыняць святую Камунію ў велікодны перыяд. У парафію ў Негарэлым па запрашэнні пробашча ксяндза Дзяніса Шастаковіча з паслугай сакрамэнтальнай споведзі прыехалі ксёндз Аляксандр Фаміных і ксёндз Канстанцін Цыбульскі.
У гэты дзень падчас цэлебрацыі Эўхарыстыі душпастыры разам з вернікамі маліліся аб міры ў нашай краіне і ў інтэнцыях, якія парафіяне падалі ў дні Навэнны да святога Юзафа.
У межах праграмы рэкалекцый быў праспяваны Акафіст да святога Юзафа, а таксама прагучалі спевы музычнага гурта Laudans, які падрыхтаваў глыбокія разважанні пра асобу святога апекуна Езуса і Марыі.
