У гродзенскай парафіі Святога Духа (Альшанка) прайшлі велікапосныя рэкалекцыі, якія распачаліся ва ўрачыстасць святога Юзафа 19 сакавіка. Рэкалекцыяніст ксёндз Юрый Павайба разам з парафіяльнай супольнасцю разважаў на тры тэмы: слова, вера і сакрамэнт пакаяння.
Удзельнікам рэкалекцый усцяж спадарожнічала асоба святога Юзафа — чалавека ўчынкаў, а не слова.
Адметнасцю парафіяльнага жыцця на Альшанцы з’яўляецца наяўнасць малітоўнай суполкі Мужчын святога Юзафа, якая дзейнічае таксама ў гродзенскай катэдры.
Ужо трэці год на малітву ў капліцы збіраюцца хлопцы і мужчыны не толькі з парафіі, але і з усяго горада.
Так, пасля асноўнай праграмы велікапосных рэкалекцый прадстаўнікі парафіяльнай і катэдральнай суполак Мужчын святога Юзафа засталіся ў капліцы і правялі ружанцовую малітву перад выстаўленым Найсвяцейшым Сакрамэнтам. Разважаючы аб ролі мужчыны ў сям’і і грамадстве, яны прасілі аб заступніцтве святога апекуна і даручалі сябе Найсвяцейшай Панне Марыі.
