21 лютага Апостальскі адміністратар Мінска-Магілёўскай архідыяцэзіі біскуп Казімір Велікаселец ОР прыбыў з пастырскім візітам на Магілёўшчыну.
Візіт распачаўся з дамініканскай парафіі Святога Казіміра і святой Ядвігі, дзе служаць сабраты іерарха. Прасля прывітальных словаў біскупа Аляксандра Яшэўскага SDB, Біскупскага вікарыя для горада Магілёва і Магілёўскай вобласці, іерарх звярнуўся з пастырскім словам да вернікаў.
Біскуп Велікаселец нагадаў пра значэнне і моц малітвы і жыццё паводле веры.
Узгадваючы выказванні вядомых людзей пра існаванне Бога і прыводзячы апалагетычныя доказы Яго існавання біскуп Казімір заахвоціў не паддавацца спакусе жыць без Бога, а падчас Вялікага посту яшчэ больш наблізіцца да Яго.
Пастырскі візіт іерарха працягнуўся ў старажытнай магілёўскай катэдры, дзе біскуп узначаліў цэлебрацыю святой Імшы і маліўся за ўсю архідыяцэзію, выпрошваючы неабходныя дары для Магілёўшчыны.
У казанні Апостальскі адміністратар Мінска-Магілёўскай архідыяцэзіі звярнуў увагу на важнасць пазнання Бога ў жыцці кожнага чалавека і заахвоціў прысутных паразважаць пра шляхі гэтага пазнання, а таксама пра плады, якія прыносіць жыццё, напоўненае верай у Бога.
Жадаючы плённага перажывання Вялікага посту біскуп Велікаселец заклікаў наследаваць Езуса, які не вёў дыскусій са злым духам, а кожны раз моцай Божага Слова перамагаў яго.
У гэты ж дзень іерарх наведаў парафію Святога Антонія Падуанскага, якой апякуюцца айцы клярэтыны, пазнаёміўся з душпастырамі і ходам будаўніцтва новага касцёла.
Візіт Апостальскага адміністратара на Магілёўшчыну працягнецца да 23 лютага.
22 лютага іерарх у суправаджэнні біскупа Аляксандра Яшэўскага SDB сустрэнецца са старшынёй Магілёўскага аблвыканкама Леанідам Зайцам, старшынёй Магілёўскага гарвыканкама Уладзімірам Цумарэвым і іншымі прадстаўнікамі мясцовай улады.
У гэты ж дзень іерарх наведае каталіцкія парафіі ў Горках, Шклове і Бялынічах.
23 лютага біскуп Казімір Велікаселец правядзе пастырскую сустрэчу духавенства і кансэкраваных асоб магілёўскага рэгіёну, якая пройдзе ў старажытнай катэдры Унебаўзяцця Найсвяцейшай Панны Марыі і святога Станіслава.
