У 2021 плануецца публікацыя аб’ёмнага навуковага выдання, у якім будуць змешчаны гістарычныя дакументы, прысвечаныя жыццю і дзейнасці Слугі Божага Эдварда Вайніловіча, грамадска-палітычнага і культурнага дзеяча пачатку ХХ стагоддзя, фундатара касцёла святых Сымона і Алены ў Мінску (Чырвоны касцёл).
Аўтарам кнігі з’яўляецца гісторык, прафесар гуманітарных навук Вармінска-Мазурскага ўніверсітэта ў Ольштыне (Польшча) Роман Юркоўскі. У выданні, між іншым, будуць змешчаны і прааналізаваны афіцыйныя дакументы і асабістыя лісты Слугі Божага.
У Каталіцкім Касцёле тытул «Слуга Божы» надаецца асобе, адносна якой вядзецца працэс далучэння да ліку благаслаўлёных. Працэс беатыфікацыі Эдварда Вайніловіча распачаўся ў 2016 годзе, а з 2017 года яго імя носіць сквер каля Чырвонага касцёла.
Працэс прызнання благаслаўлёным (беатыфікацыі) патрабуе дакладнага вывучэння дакументаў, якія звязаны з кожным Слугой Божым. Даследаванне, якое праводзіць прафесар Роман Юркоўскі, паслужыць не толькі гэтай мэце, але і папулярызацыі асобы Эдварда Вайніловіча.
Для далейшага даследавання спадчыны Эдварда Вайніловіча парафія Свв. Сымона і Алены ў Мінску просіць адгукнуцца ўсіх, хто валодае інфармацыяй на гэтую тэму. Вельмі важнымі з’яўляюцца сведчанні людзей, якія чулі пра Эдварда Вайніловіча ад тых, хто ведаў яго асабіста або сутыкаўся з яго асяроддзем.
Інфармацыю на гэтую тэму можна дасылаць на электронную скрыню vlad_za@tut.by.
