2 лютага супольнасць Міждыяцэзіяльнай вышэйшай духоўнай семінарыі ў Гродне адзначыла свята Ахвяравання Пана.
На сайце сваёй Alma Mater vdsgrodna.by семінарысты адзначаюць, што гэтае свята нагадвае вернікам пра евангельскую падзею, якая адбылася калісьці ў Ерузалемскай святыні. Згодна з законам Майсея, кожная жанчына, якая нарадзіла дзіця, лічылася нячыстай, не мела магчымасці ўвайсці ў святыню і павінна была прайсці абрад ачышчэння, а ўсе першынцы павінны былі быць ахвяраваныя Богу як знак падзякі за выратаванне першынцаў падчас Зыходу з Егіпта.
Такі абрад прайшла і сям’я з Назарэта. Марыі і Юзафу належала прынесці ў ахвяру пару туркавак або двух галубкоў, што яны і зрабілі. Такім чынам Ерузалемская святыня стала месцам сустрэчы Бога з чалавецтвам, а ахвяраванне Езуса ў святыні — правобразам ахвяры, якую Ён прынёс Богу Айцу на крыжы.
Раніцай, устаўшы крыху пазней, чым звычайна, семінарысты сабраліся ў капліцы на супольнай Ютрані, тэксты якой у гэты дзень засяроджаны на падзеі ахвяравання Езуса ў святыні.
Правёўшы разважанне над урыўкам Евангелля, прызначаным на Ахвяраванне Пана, будучыя святары ўзялі ўдзел у святочнай Эўхарыстыі, цэлебрацыю якой узначаліў дапаможны біскуп Гродзенскай дыяцэзіі Юзаф Станеўскі.
Канцэлебравалі святую Імшу ксёндз прэлат Ежы Лявінскі і выхавацелі семінарыі на чале з рэктарам ксяндзом Віталем Вайцяхоўскім.
Падчас Імшы ўся семінарыйная супольнасць малілася за кансэкраваных асобаў — тых, кто прысвяціў сваё служэнне Богу і Касцёлу, аб новых пакліканнях і развіцці кансэкраванага жыцця.
