10 студзеня, у свята Хросту Пана, у касцёле Найсвяцейшай Тройцы (святога Роха) у Мінску адбыўся сакрамэнт канфірмацыі, які ўдзяліў Мітрапаліт Мінска-Магілёўскі на пенсіі арцыбіскуп Тадэвуш Кандрусевіч.
Гэтую падзею 32 вернікі самай старажытнай каталіцкай парафіі беларускай сталіцы чакалі цэлы год: пасля падрыхтоўкі і заняткаў, якія праводзілі ксёндз канонік Юрый Санько і сястра Юлія, канфірмацыя павінна была адбыцца ў лютым мінулага года, але з-за пандэміі яе перанеслі на канец жніўня, а потым арцыбіскуп быў вымушаны жыць за мяжой. Ксёндз Юрый прапанаваў парафіянам дачакацца іерарха, і яны з гэтым пагадзіліся.
У дзень канфірмацыі ў касцёле сабраліся не толькі католікі, але і вернікі іншых вызнанняў.
Шмат хто прыйшоў проста каб пабачыць арцыбіскупа. Разам з іерархам у цэлебрацыі ўзялі ўдзел ксёндз прэлат Андрэй Стэцкевіч, ксёндз канонік Юрый Санько, ксёндз Міхал Сапель і ксёндз Кірыл Бардонаў у якасці цырымоніймайстра.
У гаміліі арцыбіскуп не раз звяртаўся да тых, хто прыняў сакрамэнт хрысціянскай сталасці, распавядаў пра вартасць гэтага сакрамэнту і пра тое, што іх навучанне ў касцёле — толькі пачатак і што Евангелле павінна быць іх настольнай кнігай кожны дзень.
Пасля ўдзялення сакрамэнту парафіяне павіншавалі арцыбіскупа з нядаўнім юбілеем і падзякавалі за яго сведчанне веры і прысутнасць у святыні.
Прамоўцы не маглі стрымаць слёз, апладысменты не сціхалі некалькі хвілін. Словы віншаванняў прагучалі ад моладзі, супольнасцяў «Жывы місійны Ружанец», якая цяпер налічвае больш за 500 чалавек, і «Легіён Марыі».
