27 снежня, у свята Святой Сям’і, Мітрапаліт Мінска-Магілёўскі арцыбіскуп Тадэвуш Кандрусевіч наведаў парафію Нараджэння Насвяцейшай Панны Марыі ў Заслаўі, дзе ўзначаліў цэлебрацыю святой Імшы.
Заслаўская парафія сёлета адзначае сваё 600-годдзе, галоўны фэст адбыўся 6 верасня. Арцыбіскуп Кандрусевіч не мог прысутнічаць на фэсце з прычыны немагчымасці трапіць на радзіму.
Мітрапаліт Мінска-Магілёўскі памятаў пра сваё абяцанне пабываць у гэтай парафіі і наведаў яе на трэці дзень пасля вяртання ў Беларусь. Падзяліць з мясцовымі парафіянамі радасць сустрэчы і выказаць сваю павагу прыйшлі не толькі католікі, але і вернікі іншых канфесій, а таксама праваслаўны святар Заслаўя і старшыня Заслаўскага гарвыканкама.
У гаміліі арцыбіскуп адзначыў неабходнасць вырашэння ўсіх праблем і прыватнага, і грамадска-палітычнага жыцця на аснове хрысціянскіх прынцыпаў і каштоўнасцяў.
Асаблівую ўвагу ён звярнуў на праблемы сучасных сем’яў і даручыў іх апецы Святой Сям’і з Назарэта.
У словах падзякі пробашч кс. канонік Дзмітрый Пухальскі і вернікі адзначылі, што аўтарытэт арцыбіскупа Тадэвуша Кандрусевіча як пастыра прызнаецца ўжо не толькі католікамі. Таксама прагучалі словы віншаванняў арцыпастыру з надыходзячым 75-годдзем і падзяка за прызначэнне кс. Пухальскага пробашчам парафіі.
