20 снежня ў парафіі Маці Божай Будслаўскай у Мінску выступіў хор праваслаўнай парафіі Свяціцеля Мікалая Японскага.
Выступленне хору на чале з настаяцелем протаіерэем Паўлам Сердзюком стала добрай каляднай традыцыяй і з’яўляецца падарункам ад вернікаў праваслаўнай парафіі, якая знаходзіцца па суседстве з каталіцкай парафіяй Маці Божай Будслаўскай на Каменнай Горцы.
Хор ужо некалькі гадоў наведвае парафію Маці Божай Будслаўскай з канцэртамі, падзяляючы радасць свята Божага Нараджэння.
Салісты хору — людзі розных прафесій, ёсць і такія, хто быў у калектыве з моманту яго заснавання. У ліку харыстаў ёсць прафесійныя музыканты і аматары.
Каляды — самае светлае хрысціянскае свята, якое ахутвае людзей у зімовую сцюжу цеплынёй і надзеяй. Спевы на свята Божага Нараджэння папулярныя ў многіх краінах свету і дазваляюць ўзмацніць святочны настрой. Паслухаць духоўную музыку і царкоўныя канты была магчымасць для ўсіх жадаючых. Хор пад кіраўніцтвам рэгента Мікіты Булахава ў выступленнi злучыў усё багацце праваслаўнай музыкі за пяць стагоддзяў.
У гэты дзень хор у касцёле спяваў дакладна тое, што спявалі анёлы ў Бэтлееме, калі нарадзіўся Хрыстус: аб вялікім дары i цудзе прыйсця Бога на зямлю, аб надзеі, веры і любові, аб тым добрым і светлым, што дапамагае душы чалавека перажыць цемру і холад доўгіх зімовых начэй.
Культурныя і духоўныя мерапрыемствы паміж каталіцкай і праваслаўнай парафіямі — знак сяброўства, імкненне рабіць добрыя справы разам, жаданне несці радасную вестку пра нараджэнне Збаўцы агульным словам і агульным дзеяннем. У сэрцах вернікаў гэта знаходзіць водгук.
Яны прыйшлі не толькі паслухаць спевы, але і разам памаліцца, паразмаўляць і выказаць віншаванні з надыходзячымі святамі.
Салісты хору перадалі ўсім католікам сардэчныя віншаванні і выказалі радасць ад наведвання касцёла, пажадаўшы ўсім шчаслівых Калядаў, міру і пераадолення нягод.
