19 снежня ў касцёле Найсвяцейшай Тройцы (св. Роха) на Залатой Горцы ў Мінску Генеральны вікарый Мінска-Магілёўскай архідыяцэзіі біскуп Юрый Касабуцкі ўдзяліў сакрамэнт пасвячэння ў ступені прэзбітэрату дыякану Міколу Гракаву.
Новапрэзбітэр паходзіць з Залатагорскай парафіі, з’яўляецца выпускніком Міждыяцэзіяльнай вышэйшай духоўнай семінарыі імя святога Тамаша Аквінскага ў Пінску і супрацоўнікам парталу Catholic.by.
Пасвячэнне адбылося падчас святой Імшы, якая з-за складанай эпідэміялагічнай сітуацыі прайшла ў абмежаваным коле ўдзельнікаў і з захаваннем неабходных санітарных прадпісанняў.
На пачатку цэлебрацыі біскуп Юрый Касабуцкі адзначыў, што пасвячэнне нездарма адбываецца ў святыні на Залатой Горцы, з якой непарыўна звязана гісторыя паклікання Міколы Гракава. У прамоўленым Божым слове пастыр звярнуў увагу на неабходнасць у святарскім жыцці заўсёды шукаць волю Бога і прымаць яе, хоць гэта часам бывае няпроста.
«Толькі з дапамогаю веры, надзеі і любові можна пераадолець усе цяжкасці на шляху гэтага служэння, да якога Бог кліча звычайных людзей, даручаючы ім незвычайную місію абвяшчэння Яго Валадарства ў свеце», — падкрэсліў іерарх.
Пасля прыняцця прэзбітэрскага пасвячэння ксёндз Мікола Гракаў працягне працу на партале Catholic.by.
