Пры падтрымцы дабрачыннага каталіцкага таварыства Caritas Мінска-Магілёўскай архідыяцэзіі быў праведзены рамонт у памяшканнях, дзе размясцілася бальніца сястрынскага догляду ў Крычаве, што на Магілёўшчыне.
Раней гэтая ўстанова знаходзілася воддаль ад асноўных карпусоў Крычаўскай ЦРБ, што ўскладняла работу медыцынскага персаналу па догляду за пажылымі людзьмі. У верасні з’явілася магчымасць перанесці бальніцу сястрынскага догляду ў будынак старога неўралагічнага аддзялення ЦРБ, аднак памяшканні мелі патрэбу ў рамонце.
Будаўнічыя працы завяршыліся, створаны камфортныя ўмовы для пражывання, памяшканні сталі ўтульнымі і светлымі, што важна для добрага настрою і самаадчування людзей.
Пасля рамонту ва ўстанову былі дадаткова перададзены сем медыцынскіх ложкаў. Сёння ў аддзяленні атрымліваюць медыцынскую дапамогу і догляд 35 чалавек. Пасля рамонту бальніцу наведаў Біскупскі вікарый для горада Магілёва і Магілёўскай вобласці біскуп Аляксандр Яшэўскі SDB разам з дырэктарам ДКТ Caritas Мінска-Магілёўскай архідыяцэзіі братам Андрэем Жылевічам OFMCap.
Праект быў рэалізаваны пры фінансавай падтрымцы Caritas Пражскай архідыяцэзіі (Чэхія).
