14 кастрычніка ў парафіі Маці Божай Будслаўскай у Мінску вернікі маліліся аб здароўі, шчасці, духоўным супакоі і Божым благаслаўленні для ўсіх маці. У касцёле таксама адбылося адкрыццё выставы «Мама імя тваё».
Вобраз мацярынства ўшанаваны чалавецтвам з часу яго стварэння Богам на зямлі. Для вернікаў увасабленнем мацярынскай веры, памяркоўнасці, цярплівасці, дабрыні і высокіх маральных якасцяў з’ўляецца Маці Божая. Хрысціяне ва ўсім свеце з вялікай любоўю ўшаноўваюць Марыю — сваю добрую нябесную Матулю.
У Дзень маці шмат вернiкаў прыйшло ў касцёл Маці Божай Будслаўскай, каб памаліцца за самага блізкага чалавека — за сваю маму.
Хоць дзеці сталеюць, ствараюць свае семі і самі становяцца бацькамі, аднак сувязь з мамай з гадамі не слабне. Таму выстава малюнкаў, якая адкрылася ў Дзень маці ў сталічнай парфіі — гэта творчы выраз падзякі вернікаў сваім мамам.
