У нядзелю 6 верасня ў парафіі Божага Цела ў Мінску адбылася ўрачыстасць Першай Камуніі. Больш за 20 дзяцей упершыню прынялі ў свае сэрцы Езуса Хрыста ў Эўхарыстыі і ва ўсёй паўнаце ўдзельнічалі ў святой Імшы.
Пробашч парафіі а. Аляксандр Стока OCD у гаміліі пажадаў дзецям, каб у іх ніколі не згасла вера ў Таямніцу Эўхарыстыі і каб Хлеб, які сышоў з неба, яны палюбілі ўсім сэрцам і розумам назаўсёды.
Па словах святара, Бог прыцягвае да Сябе праз Эўхарыстыю і міласэрную любоў да нас, і смак Божай любові мы не можам дазволіць сабе страціць ніколі.
Эўхарыстыя, як адзначыў ён, яднае нас у любові і свабодзе Божых дзяцей.
На заканчэнне Імшы бацькі дзяцей, якія прыступілі ў гэты дзень да Першай Камуніі, падзякавалі за дар Эўхарыстыі, які здзяйсняецца няспынна праз рукі святара.
