Рэспубліканскае аб’яднанне супольнасцяў хрысціянаў поўнага Евангелля выказала абурэнне тым, што арцыбіскупу Тадэвушу Кандрусевічу было адмоўлена ва ўездзе ў Беларусь.
Адкрыты зварот евангелісцкай супольнасці быў апублікаваны 1 верасня на сайце РАС ХПЕ Gospel.by. У ім, у прыватнасці, сказана:
«Аб’яднанне хрысціянаў поўнага Евангелля ў Рэспубліцы Беларусь выказвае абурэнне ў сувязі з адмовай ва ўездзе ў Рэспубліку Беларусь Мітрапаліту арцыбіскупу Тадэвушу Кандрусевічу, які ўздымаў свой голас у абарону міру, міласэрнасці і адзінства, асуджаючы насілле, падман і нянавісць.
Гэта з’яўляецца духоўным і маральным абавязкам кожнага рэлігійнага служыцеля, а не палітычнай дзейнасцю
Бог у сваім слове ясна кажа пра тое, што кожны чалавек дасць адказ перад Ім за свае справы. І пакуль ёсць магчымасць, чалавеку неабходна пакаяцца ў граху і выбраць следаванне справядлівымі шляхамі Божымі.
Згодна з Бібліяй, грамадзянская ўлада паклікана падтрымліваць дабро і караць зло. Калі ж грамадзянская ўлада паступае наадварот, то яна не выконвае свайго прызначэння ад Бога.
Мудрым рашэннем будзе не перашкаджаць святарам выконваць служэнне, да якога паклікаў іх Бог і прыслухоўвацца да іх, каб не стаць змагарамі з Богам.
Мы выказваем падтрымку нашым братам у Езусе Хрысце, католікам Беларусі і <…> молімся аб хутчэйшым вырашэнні непаразумення, звязанага з перашкодаю арцыбіскупскаму служэнню Тадэвуша Кандрусевіча ў Беларусі».
Зварот падпісалі епіскап РАС ХПЕ у РБ Леанід Вараненка, Рада епіскапаў і служыцеляў Аб’яднання.
Генеральны вікарый Мінска-Магілёўскай архідыяцэзіі біскуп Юрый Касабуцкі выказаў падзяку братам у Хрысце за тое, што ў гэтай складанай сітуацыі яны падтрымліваюць Касцёл у Беларусі словам і супольнай малітвай.
«Гэта сведчанне таго, што мы сёння, як і хрысціяне апостальскіх часоў, „адзіныя сэрцам і душою“ (пар. Дз 4, 32)», — дадаў іерарх, які ва ўмовах вымушанай адсутнасці арцыбіскупа Тадэвуша Кандрусевіча ажыццяўляе пастырскае кіраванне Мінска-Магілёўскай архідыяцэзіяй Каталіцкага Касцёла ў Рэспубліцы Беларусь.
