У нядзелю 23 жніўня ўпершыню за шмат гадоў вернікі па ўсёй краіне не змаглі пачуць трансляцыю святой Імшы, якая штонядзелю ў 8.15 вялася на Беларускім радыё.
У рэдакцыю парталу Catholic.by пачалі звяртацца католікі з розных мясцін Беларусі, якія з розных прычын, у тым ліку і з-за складанай эпідэміялагічнай сітуацыі, не могуць асабіста быць у касцёле ў нядзелю. Для тых з іх, хто не карыстаецца інтэрнэтам, а гэта перадусім старэйшыя людзі, трансляцыя святой Імшы на Беларускім радыё — практычна адзіная магчымасць пачуць Божае слова і духоўна ўдзельнічаць у святой Імшы ў нядзелю — дзень Пана.
Як паведаміў Catholic.by пробашч мінскай катэдральнай парафіі Найсвяцейшага Імя Марыі ксёндз канонік Антоній Клімантовіч, святая Імша з трансляцыяй павінна была адбыцца, і для яе цэлебрацыі згодна з графікам быў вызначаны святар.
Аднак да пробашча патэлефанавалі з Беларускага радыё і папарэдзілі, што трансляцыі ў гэтую нядзелю не будзе па тэхнічных прычынах.
Ці будуць адбывацца трансляцыі ў далейшым, супрацоўнікі радыё не ўдакладнілі.
Нагадаем, што на нашым партале вядуцца рэгулярныя відэатрансляцыі святой Імшы з розных касцёлаў.
Трансляцыя нядзельнай святой Імшы на «Радыё Марыя» сёння будзе весціся ў 19.00 з касцёла святога Яна Хрысціцеля ў Мінску (Серабранка).
