Адпустовая ўрачыстасць у гонар Маці Божай Бялыніцкай адбудзецца ў нядзелю 6 верасня з удзелам Генеральнага вікарыя Мінска-Магілёўскай архідыяцэзіі біскупа Юрыя Касабуцкага.
Нягледзячы на адсутнасць у сувязі са складанай эпідэміялагічнай сітуацыяй арганізаваных пілігрымак, Маці Божая чакае ўсіх.
Урачыстая святая Імша адбудзецца ў Бялынічах 6 верасня а 15-й гадзіне на месцы даўніх каталіцкіх могілак. Цэлебрацыю ўзначаліць біскуп Юрый Касабуцкі.
Непасрэдна перад фэстам у Бялынічах пройдзе Саракагадзіннае набажэнства, на якое запрашаюць духоўных валанцёраў з усёй Беларусі.
Пробашч бялыніцкай парафіі кс. Юзаф Сярпейка кажа:
«Гледзячы на прыгожы прыклад мноства прыватных пілігрымак да іншых святынь нашай Бацькаўшчыны, мы запрашаем усіх людзей добрай волі завітаць у некалі слаўныя і вядомыя марыйным культам Бялынічы. Пешыя, аўтамабільныя, аўтобусныя пілігрымкі ці нават на роварах або матацыклах — усе няхай прыйдуць, каб ахвяраваць сябе Маці Божай Бялніцкай, Каралеве Беларусі».
