Апоўдні 1 ліпеня ў Будслаў прыбылі ўдзельнікі прыватнай мотапілігрымкі святароў. У Нацыянальным санктуарыі яны сустрэліся са сваімі братамі, якія ішлі сюды пешкі.
Тры святары і адзін брат законны выйшлі пехатою з Баранавічаў у дарогу да Маці Божай Будслаўскай 23 чэрвеня і на восьмы дзень дасягнулі мэты. Іх прыватная пілігрымка была арганізавана толькі ўласнымі сіламі.
Пераадольваючы штодзённы шлях — у сярэднім каля 30–35 км, — яны маліліся ў інтэнцыях, якія ім дасылалі вернікі.
Пасля кранальнага моманту малітвы перад цудадзейным абразом Маці Божай Будслаўскай, адзін з удзельнікаў пілігрымкі айцец Яўген Голуб OFM замест адпачынку адразу пачаў дапамагаць у апошніх прыгатаваннях да фэсту.
…Нізкі гул матораў на плошчы перад базылікай абвясціў аб прыбыцці пілігрымкі ксяндзоў-байкераў. Зрабіўшы кола гонару вакол Чырвонай плошчы, святары прыпаркавалі жалезных коней каля ўваходу ў святыню, каб прывітаць Нябесную Матулю ў Яе будслаўскай іконе.
Па дарозе ў Нацыянальны санктуарый кс. Павел Ярашэвіч, кс. Юрый Медушэўскі і кс. Юзаф Парфяновіч, якія вырушылі на байках з Лагішына 27 чэрвеня, наведалі мясціны беларускай зямлі, дзе асаблівым чынам ушаноўваецца Маці Божая.
Святары стартавалі ад лагішынскага санктуарыя Каралевы Палесся, маліліся перад цудадейнымі абразамі Маці Божай у Брэсце, Тракелях, Гудагаі, Браславе, Бялынічах і, нарэшце, у Будславе. Па дарозе яны таксама збіралі малітоўныя інтэнцыі вернікаў, каб скіраваць іх да Бога праз заступніцтва Багародзіцы.
