17 чэрвеня у лідскай парафіі Святой Сям’і ўрачыста адзначылі 25-годдзе з дня прэзбітэрскага пасвячэння пробашча гэтай супольнасці ксяндза каноніка Юзафа Ганьчыца — аднаго з першых выпускнікоў Гродзенскай духоўнай семінарыі.
Як паведаміў партал Grodnensis.by, з гэтай нагоды юбіляр узначаліў цэлебрацыю святой Імшы падзякі ў парафіяльнай святыні, якая была пабудавана ў адным з найбольш каталіцкіх гарадоў Беларусі дзякуючы яго намаганням.
На Эўхарыстыі сабраліся шматлікія парафіяне і госці з іншых месцаў, каб атачыць малітвамі кс. Юзафа і дзякаваць Богу за ўсе дары і ласкі, якія атрымалі праз яго пастырскае служэнне.
Гамілію прамовіў кс. канонік Чэслаў Паўлюкевіч, кусташ санктуарыя Пана Езуса Журботнага ў Росі (Ваўкавыскі дэканат). Ён разважаў у ёй над таямніцай святарства.
На заканчэнне Эўхарыстыі ў адрас юбіляра прагучала шмат цёплых словаў ад яго парафіянаў, якія падкрэслілі, што за ўсе гады служэння святар стварыў у парафіі атмасферу сапраўднай сям’і, дзе кожны можа адчуваць сябе патрэбным і любімым.
Са свайго боку кс. Юзаф Ганьчыц, дзякуючы за цеплыню, якую атрымаў і працягвае атрымліваць у Лідзе, запэўніў усіх даручаных яго апецы, што ўдзячны Пану за кожнага і падтрымлівае іх сваімі малітвамі.
